Manipur-ah mipui pungkhawm hnuah sipaite'n khua chhuah san
Manipur-a meitei pawl, Kanglei Yawol Kanna Lup (KYKL) militant member-te bihrukna hmun, Imphal East-a Itham khuaa mipui lut leh chhuak tur sipaite'n an dan duh lo a, nu ho kaihhruaia khaw mipuite an pun khawm hnuah sipaite hian an ralthuam mante nen khua hi an chhuahsan.
Sipaite hian civil mite nunna tihderthawn duh loin, silai leh silai mu an mante nen khua hi an chhuahsan niin nimin khan official-te chuan an sawi.
Meitei hel pawl, Kanglei Yawol Kanna Lup (KYKL)-te hi buaina chhuak tam takah inhnamhnawih tawhin, kum 2015-a Dogra unit beihnaah pawh a mawhphurhtu a ni.
Itham khuaa sipaite leh mipui pungkhawmte Inrinni nilenga an inhmachhawn hnuah, sipaite chuan mipui thinrim pung khawm chu tharum hmanga an do let chuan buaina lian tham leh hliam tuar an awm dawn tih hriain an inhnukkir tih sorkar thuchhuah chuan a tarlang.
Itham khuaa biru zingah hian Dogra beihnaa an thluak bur ber nia rin, police-in an zawn mek Lt. Col. Moirangthem Tamba pawh a tel.
Churanchandpur-ah Kuki-Zomi-te'n silent coffin march nei
Manipur-a tribal zirlai pawl huaihawtin, Inrinni liam ta khan Churachandpur district-ah tualchhung buaina chhuaka thite sunna leh hriatrengna pualin, silent coffin march an buatsaih.
Silent march hi km 3-a thui neiin, district hospital aṭanga district mini-secretariat awmna, Tuibong-a Peace Ground thleng neih a ni a, tel an ṭhahnem hle.
Kawngzawhnaa telte hi thawmhnaw duma inthuamin, buaina chhuaka tribal thite hriatrengna atan, kuang ruak 100 an zawn tel bawk. Kawng zawh tawpna an thlen hian an kuang zawnte chu nghatin, an chhungte'n pangpar an lo dah a ni.
Jantar Mantar-ah lungawi lohna lantir
Inrinni liam ta vek khan Delhi-a Jantar Mantar-ah civil society organisation 40 vel chuan lungawi lohna lantirin, Manipur tualchhung buaina thleng mekah sorkar laipui chu che chhuak thuai turin an phut.
Pung khawmte hian Delhi Police kaltlangin Home Minister Office-ah memorandum an theh lut bawk a, sorkar laipuiin a lo puan tawh, Judicial Commission chu Manipur-a buaina chhuak kaihhnawiha case ziah luhte dik tak leh hleih nei loa chhuitir vek an phut. Hei bakah hian buaina thlentute chunga na taka hremna lek kawh a, tualchhung buaina tuartute tana zangnadawmna pek tur puan chu ennawn leh an phut thu an sawi.
Civil society group-te chuan rehabilitation camp hrang hrang awmte chu an mamawh hrang hrangte pek a, an in lama an kir leh theihna tura a rang thei anga hma la tura thuneitute an phut thu an tarlang.
Amit Shah-a'n all party meeting nei
Union Home Minister Amit Shah hoin Inrinni khan Manipur tualchhung buaina thleng mek leh, buaina chinfel dan tur ngaihtuahin Delhi-ah all party meeting neih a ni.
Amit Shah chuan June 13 hnuah Manipur-ah hian nunna chan an la awm leh lo tih sawiin, boruak ralmuang leh inrintawnna a awm leh theihna atan theihtawp chhuahpui turin political party zawng zawngte a sawm.
Meeting-ah hian political party 18 an tel a, hmarchhak aṭangin MP pali leh Chief Minister pahnih an tel bawk. Congress party leh eptu pawl dang ṭhenkhat chuan Manipur-ah all-party aiawh tirh an rawt a, Chief Minister, N Biren Singh ban a, President rule puan rawtna pawh a awm bawk.