Amit Shah-in Assam tuilian tuarte ṭanpuina pek tiam

Union Home Minister Amit Shah chuan Assam Chief Minister Himanta Biswa Sarma biain, Assam-in tuilian nasa tak a tuar chungchangah sorkar laipuiin ṭanpuina a pek theih zawng zawngte pek a tiam. Shah chuan Assam-in hun harsa tak an tawn mek lai hian, Modi sorkar chu an tan a awm reng tih a hrilh.

"Ruah nasa tak sur vangin, Assam-a hmun ṭhenkhatah tui nasa takin a lian mek a ni. CM Himanta ka be tawh a, ṭanpuina pek theih zawng zawng pek ka tiam. NDRF team-te chuan chhanchhuah hna leh chhawmdawl hna an thawk mek a, team dangte pawh a ṭul huna che chhuak turin an inring reng," tiin Amit Shah chuan a Twitter-ah a tarlang.

Nimin thleng khan Assam tuilian hian ziaawm lam a la pan thei lo a, tuiin a chim chin hi tlemin kiam deuh mah se, district pakuaah tuilian tuartu mi nuai li an la awm mek tih sorkar thuchhuah chuan a tarlang. State chhung hmun hrang hranga tui lian avang hian mi pathumin nunna an chan tawh tih Assam State Disaster Management Authority (ASDMA) official chuan a sawi bawk.

ASDMA-in a tarlan danin, Baksa, Barpeta, Darrang, Dhubri, Goalpara, Kamrup, Lakhimpur, Nalbari leh Udalguri district-ahte mi 4,07,700-in tuilian hi an tuar a ni.