Assam CM ṭawngkam avangin Akhil Gogoi-a'n Obama ngaihdam dil

Assam MLA, Akhil Gogoi chuan June 24-a Prime Minister Narendra Modi tana video message a siamah Assam Chief Minister Himanta Biswa Sarma-in mawi lo tak leh ngaihbel theih tura US President hlui Barack Obama hming a lam tel avangin ngaihdam a dil.

He a video-ah hian,"Chibai Modiji, Assam mi pakhat Akhil Gogoi ka ni a, kan Chief Minister, Dr. Himanta Biswa Sarma hian chi inthliarna leh vun rawng inthliarna lam hawia ngaih theih tak turin Barack Obama chungchang a lo sawi a ni. A aiawh hian ngaihdam ka rawn dil duh a ni. Ka unaupa leh Assam Assembly-a ka MLA-pui a nih avangin a aiawhin, a thusawi awmze nei lo tak avangin ngaihdam ka rawn dil e," tiin a sawi.

June 22 khan US President hlui, Barack Obama hian TV-ah, sakhua leh hnam tlem zawkte dinhmun chawi kan a nih loh chuan India hi ṭhendarh a la ni ang tiin a sawi. Hei hi journalist pakhat chuan Assam police-te'n Obama hi a thusawi avang hian an man duh mai ang em? tiin a tweet. He journalist tweet-ah hian CM Sarma hian chhangin, India ramah Hussain Obama tam tak an awm thu leh, chungte chu a ngaihpawimawh hmasak tur thu a sawi. Hussain hi Obama laiah hming ni mah se, Sarma hian Muslim-te beih nan a hmang angin mi tam tak chuan an ngai a ni.