Manipur tan Nagaland-ah candlelight march nei

Nagaland khawpui Kohima-ah Pathianni khan Manipur-a boruak ralmuang a awm leh theih nan candlelight march neiin an ṭawngtai a, mi tam tak an kal khawm.

Candlelight march hi Kohima Baptist Pastors’ Fellowship-in Nagaland Baptist Church Council (NBCC) Convention Centre-ah an huaihawt a, mipui kal khawmte hian Manipur-ah nunphung pangngai a awm leh theih nana ṭawngtaiin, hnam pahnih intibuaite inkarah inremna leh inhriatthiam tawnna a awm leh theihna tura an duhzia thuziakte an keng a ni.

NBCC General Secretary Rev. Dr Zelhou Keyho chuan,"Buaina tuartute an dam leh theihna tur lam hi state sorkar leh central sorkar hian an ngai pawimawh lo," a ti a, mahse, midang puh emaw, buaina chawk chhuaktute zawng chhuak tura kal khawm an ni lo tih a sawi. "Eng hnam pawh ni se, kan unaute tuarna hi kan ṭawmpui a, an tan kan ṭawngtaisak a ni. Nunna chante zawng zawng kan tuarpui tak zet" tiin a sawi. Tualchhung buaina chhuak hi a rei tawh hle tih sawiin, Rev. Dr Zelhou Keyho chuan sorkar chu buaina ching fel tur leh tharum thawhna titawp turin a ngen. Manipur hnam zawng zawngte inang khata venhimna pe turin sorkar chu a ngen bawk.

Manipur-a internet service tihtawp hun pawt sei leh

Manipur sorkar chuan tualchhung buaina chhuah hnua an state-a internet service a tihtawp chu June 30 thleng a pawt sei leh.

Pathianni khan sorkar chuan thuchhuah siamin, state chhung boruak buaina leh, boruak muanawm tibuai thei thil venna atan, internet service chu June 30, tlai dar 3 thleng tihtawp chhunzawm a nih tur thu a sawi.

Kuki leh tribal-te inkara buaina a chhuah hnuah, May 3 khan Manipur sorkar chuan state pumah mobile internet service a titawp nghal a, June 15 thleng pawh sei a ni leh a, hemi hnu hian June 25 thleng atan a pawt sei leh tawh bawk. A tum thumna atan pawt sei lehin, June thla 30 thleng tihtawp ala ni rih dawn a ni.