Kuki pawlin Manipur-a buaina chhuak zawng zawng NIA chhuitir duh
Kuki Inpi Manipur (KIM) chuan Manipur-a buaina chhuak zawng zawngte chu National Investigation Agency (NIA) chhuitir an duh thu an sawi.
KIM chuan June 21-a Bishnupur district-a Phoungakchao Awang Leikai leh Kwakta inkara lei bomb a nih chungchang NIA-in rang taka a ching fel chu ṭha an tih thu Thawhṭanni khan an sawi a, hemi rual hian hel pawl inrawlhna tih chiang reng, tun ṭum aia buaina lian zawk chhuahna tam tak chu chhui chian an la ni lo, tih an sawi.
KIM-in Manipur sorkar security adviser Kuldiep Singh kaltlanga Union Home Minister Amit Shah lehkha an thawnah, "May 3 hnua hnam leh hnam inkara buaina chhuak chungchang chin fel a tumnaah sorkar hian thlei bik nei loin, rang taka bawhzui vek ni se kan duh," tih an ziak. Kuki pawlte chuan state chhunga inrikrapna thleng zawng zawng chu NIA bawhzui tura an duh thu an thlen rualin, June 6-a Meitei Leepun hotu Pramot Singh-a'n T.V-a Kuki hnam zawng zawng tihchimit vek an ni ang, tia a sawi chungchang pawh tun thlengin bawhzuina a la awm lo a ni, an ti.
Kuki pawlte hian Coordinating Committee on Manipur Integrity (COCOMI)-in resolution a siamah chuan ralthuam ruk bo chungchang pawh anmahniin uluk taka an duan sa leh an thiltih vek a ni tih a lang chiang tih sawiin, "Indona puan leh thuneitute aṭanga ralthuam ruk leh dik lo taka chet chu rampum himna atana thil hlauhawm a ni" tiin an sawi.
KIM chuan, "Imphal valley ramria Kuki hnam awmna hel pawlin an bei reng chu rampum tan a him lo," tiin, rampum himna ngaihtuahin Manipur-a hnam leh hnam inkara inrikrapna thleng zawng zawng chu NIA ching fel turin an phut. Kuki pawlho chuan an thil phut hi ngaihthah a nih chuan, tun aia nasa zawka an chet tur thu leh engpawh thleng se a mawh an phur loh tur thu an sawi zui bawk.
PM-in a tih hmasak ber tur chu CM ban a ni - Congress President
Congress party President Mallikarjun Kharge chuan Prime Minister Narendra Modi chuan Manipui buaina chu a ngaihven a, a vei tak tak a nih chuan a tih hmasak ber tur chu Chief Minister N Biren Singh ban a ni, a ti.
Manipur-a BJP kaihhruai sorkarin an state-a buaina chhuak a hmachhawn leh, a chin felna kawnga a hlawhchham dan chu eng insawithiamna mahin a hliahkhuh thei lo tiin Congress President chuan a sawi.
"Union Home Minister Amit Shah-a'n Manipur chungchang PM Modi a sawipui thu report a awm reng hnuah, Modi hian ni 55 chhung Manipur chungchang engmah a la sawi chhuak lo. India ram mipui zawng zawngin a ṭawng hun kan nghak e," a ti.