Manipur sorkarin 'No Work, No Pay' rule hman tum

Manipur sorkar chuan May 3-a tualchhung buaina chhuah hnuah, sorkar hnathawk chawlh la hmasa loa chhan hrang hrang avanga office ṭhulhte tan 'No Work, No Pay' rule a hmang dawn tih a puang.

General Administration Department (GAD) chuan administrative secretary-te chu state chhunga buaina chhuak avanga office kal thei lote list theh lut turin a hriattir tih sorkar official chuan a sawi.

Hemi chungchanga sorkar-in thuchhuah a siamah, "June 12-a Chief Minister hoa meeting neihin a rel angin, Manipur Secretariat-a GAD hnuaia hlawh la zawng zawngte hnenah chawlh la hmasa loa hna kal lote lakah 'No Work, No Pay' rule hman a ni maithei tih hriattir an ni," tiin a tarlang.

Manipur sorkar hian hnathawk nuai khat bawr vel a nei a, a tam zawkin hna an ṭhulh rih a ni. Sorkar official-in a sawi danin, mahni in leh lo tlanchhiatsan mi 65,000 zingah hian sorkar hnathawk ṭhahnem tak an tel a, relief camp-ah te an khawsa mek a ni.

Sorkar thuchhuah hian tribal hnam, tualchhung buaina chhuah aṭanga Imphal-a la kir thei lote a ti tithinur hle a, Kuki Inpi Manipur (KIM)-te chuan state sorkarin 'No Work, No Pay' rule hman a tum chu an dodal.

KIM General Secretary Khaikhohauh Gangte chuan, "Manipur sorkar hian sorkar hnathawk, a bik takin Imphal Valley-a chengte nunna a tiderthawng a ni. Tun dinhmunah Imphal-ah let ngaihna a awm lo. Imphal-a let chu Kuki hnam tan thihna thang a ni," tiin a sawi.

Manipur-ah Rahul Gandhi zin dawn

Congress President hlui, Rahul Gandhi chuan June 29 - 30-ah Manipur a tlawh dawn tih Congress party chuan an sawi. May thlaa tualchhung buaina a chhuah hnuah Rahul Gandhi hi Manipur tlawha a zin vawi khatna tur a ni.

Congress MP Venugopal chuan, "Rahul Gandhi chuan June 29 leh 30-ah Manipur a tlawh dawn. A zin chhung hian Imphal leh Churachandpur-a relief camp-te tlawhin an harsatna te a sawipui dawn a ni," tiin Nilaini khan a sawi.

Congress party hian Manipur tualchhung buaina thleng chungchanga Prime Minister Narendra Modi ngawih tlat chhan hi vawi tam tak an zawt tawh a ni. Kar liam ta Inrinnia Union Home Minister Amit Shah-a'n Delhi-a all party meeting a koh lai pawh khan, Gandhi chuan sorkar-in eng tiang takin nge Manipur chungchang hi a ngaih pawimawh tiin a Twitter kaltlangin a zawt. "Prime Minister zin bo hlanin all-party meeting koh a ni. Prime Minister chuan he meeting hi a ngai pawimawh lo tih a ti chiang," tiin a sawi.