Assam leh Tripura state healthcare tihchangtlun nan World Bank-in USD mtd 391 puktir a remti

World Bank Board of executive directors chuan Thawhlehni khan Assam leh Tripura state-a chengte'n hriselna lama inenkawlna ṭha zawk leh ecomony-a hmasawnna an neih theih nan USD mtd 391 million puktir an remti.

World Bank Country Director for India Auguste Tano Kouame chuan, "World Bank hian India sorkar-in hmarchhak state-te tana hmasawnna hna a thawh hi kan thlawp a ni," tiin a sawi.

Assam State Secondary Healthcare Initiative for Service Delivery Transformation (ASSIST)-in World Bank sum an dawn tur aṭanga USD mtd 251 project a siam chu state chhunga healthcare service tihchangtlunna atan a hmang dawn a, mi mtd 1.8 in an chhawr ṭangkai thei dawn a ni.

He project hi nu, nau nei tur leh naupiang hlimte'n enkawlna ṭha zawk an neih theihna tur leh, natna inkaichhawn theih loh veite enkawlna tura duan a ni. District hrang hranga damlo enkawlna hmun 10-te chu district hospital-ah hlan kai a ni bawk ang.

Tripura Rural Economic Growth and Service Delivery project, USD tld 140 pawh khawtlang tihhmasawnna, tribal chhungkaw 1,42,00-te khawsak leh an hnathawhte chawi kansakna tura duan a ni. Khaw kar kawng km 400-a thui chu loneitu, tlang ram leh ramhnuaia chengte'n kumtluana an hman theih tura siam ṭhat tum a ni a, chhungkaw 75,000-te khawsakphung tihhmasawnna tur leh lo neih dan ṭha zawk an kalpui theihna tur duan a ni. He project hmang hian zirtirtu ṭha zawk lak leh mipa naupang secondary school-a a tam thei ang ber luhtir tum a ni bawk.

World Bank-in a puktik tur sum hi International Bank for Reconstruction and Development (IBRD)-in an pe chhuak dawn a, kum 10 leh a chanve chhunga rulh zawh tur niin, hemi bakah hian kum 5 grace period pek belh theih a ni.