Nagaland khawchhak lam district 6-te chungchang sawiho dawn

Nagaland sorkar chuan an state khawchhak lam district paruk-te huama autonomous council din tura sorkar laipui rawtna siam chungchangah, June 30 hian consultative meeting a buatsaih dawn.

District parukte hi - Kiphire, Longleng, Mon, Noklak, Shamator, leh Tuensang-te an ni. Heng district-te hi sorkarin ngaihthah leh, hmasawnna thleng pha ve lo nia sawiin, district paruk chhung Naga hnam pasarihte chuan kum 2010 aṭang khan state hran, Frontier Nagaland an lo phut tawh a ni. Eastern Nagaland People’s Organisation (ENPO) hnuaiah state hran phutna hi an kalpui a ni.

Ministry of Home Affairs (MHA) chuan ENPO thil phut chungchang ngaituah tur hian MHA advisor (northeast) A.K.Mishra kaihhruai, member pathum awmna committee a lo din tawh bawk.

Nagaland home department chuan June 30-ah Kohima-a State Banquet Hall-ah consultative meeting hi neih a ni dawn tih sawiin, he meeting-ah hian Chief Minister, Deputy Chief Minister, Assembly speaker, minister zawng zawng, an state aṭanga Lok Sabha leh Rajya Sabha MP-te leh Chief Secretary-te an tel ang. Anni bakah tribal organisation paruk aiawhin mi 19 an tel dawn bawk a, an zinga mi 12-te chu MLA an ni.