Rahul Gandhi-a'n Moirang-a relief camp a tlawh

Manipur tualchhung buaina chhuak vanga mipuite thlamuan tura zin, Congress party hruaitu Rahul Gandhi chuan nimin khan Moirang khuaa relief camp a tlawh a, camp-a awmte a kawm nghal bawk.

Gandhi chuan Ningani khan state chhunga tualchhung chhung buaina chhuakin a nghawng nat ber khua, Churachandpur-ah kalin relief camp-te a lo tlawh tawh bawk a ni. Churachanpur a pan lai hian, police-te chuan Gandhi convoy hi mipuite'n an lo beih mai a hlauhthawnawm nia sawiin Bishnupur-ah an lo dang a, helicopter-in Churachandpur hi a kal ta zawk a ni.

Moirang khua pawh hi Imphal aṭangin helicopter-in a pan a, Chief Minister hlui O Ibobi Singh, party General Secretary, KC Venugopal, PCC President Keisham Meghachandra Singh leh MP hlui Ajay Kumar-te'n an ṭawiawm.

Congress hruaitu hian tualchhung buaina avanga in leh lo tlanchhiat san, relief camp-a khawsa mekte chu kawmin, buaina avanga an hmangaihte leh an in chantute dinhmun tawn mek chuan a rilru a ti na tak zet tih a sawi. A mi tawnte hmelah chuan ṭanpuitu ngai hmel a hmu tih sawiin, Manipur-in a mamawh pawimawh hmasa ber chu remna leh muanna a awm a ni, a ti. Hemi atan hian mi tinte thawhho a ṭul thu a sawi bawk.

Gandhi hian Imphal-ah political party 10 hruaitute leh, civil society member hrang hrangte a kawm bawk.

Manipur CM-in ban a tum loh thu a sawi

Manipur-a hnam leh hnam inkara buaina nasa tak chhuak a mi tam takin nunna an chan hnuah, tun thlenga buaina chinfel a la nih loh avangin eptute chuan Chief Minister N Biren Singh chu bang turin an phut nasa hle. Mahse, nimin khan Chief Minister hian a ban loh tur thu a sawi.

Nimin khan CM Singh hian banna a theh lut dawn tih thuthang a awm hman a, hei vang hian amah ṭantu mi eng emaw zat chu Chief Minister chenna in bulah pung khawmin, banna theh lut tura a kal chhuah theih lohna turin an dang a ni.

Mahse Singh chuan pung khawmte hnenah hian Chief Minister a nihna aṭanga ban a tum loh thu a hrilh a, hemi hnu hian pung khawmte pawh hi an ṭin darh ta a ni.