SC-in Kuki hnam ven himna pek dilna July 3-ah ngaihtuah dawn

Supreme Court chuan NGO Manipur Tribal Forum-in Manipur-a Kuki hnamte tana sipai ven himna pek an dilna chu July 3-ah a ngaihtuah dawn.

Chief Justice of India DY Chandrachud, justices - PS Narasimha leh Manoj Misra ṭhutna vacation bench chuan hemi chungchang hi a ngaihtuah ang.

June 20 khan Justice Surya Kant chuan Kuki hnamte tana ven himna pek chungchang hmanhmawh taka ngaihtuah tura urgent hearing dilna chu, dan leh hrai kaihhnawih a nih avangin administration lamin an bawhzui tur a ni tiin a hnawl a ni. NGO-te dinsaktu ukil Colin Gonsalves chuan, state chhunga buaina avang hian tumah thah an ni lo ang tia tiam an nih hnuah, tribal 70-in nunna an chan tawh tiin Court-ah a thlen.

Sorkar ukil, Solicitor General Tushar Mehta chuan security agency hrang hrangte'n mipui ven him hna theihtawp chhuaha an thawh reng avangin urgent hearing chu thil ṭul a ni lo, a ti.

Vacation bench chuan hemi chungchang hi July 3-a ngaihtuah turin a dah ta a ni.

Manipur Tribal Forum chuan, sorkar laipui leh Manipur Chief Minister-te chu Kuki tribal-te tihchimit tuma thawk dunah puhin Court-ah hian an zualko a ni. Sorkar laipuiin ven himna pek a tiam chu, sorkar laipui leh Manipur CM-te'n Kuki hnam nuaibo tuma an thawh dun tlat avangin an thutiamte chu thutaka laksak loa Kuki hnamte tana sipai ven himna pe turin Court an ngen.

Assam police chief Harekrishna Deka kaihhruai SIT din bakah, tualchhung buaina chhuak avanga nunna chan chhungte Rs vbc 2 pe turin Court chu ngenin, mitthi chhungte chu sorkar hna nghet pek an ngen bawk. Supreme Court-ah hian, BJP MLA chuan Manipur High Court-in Meitei hnamte Schedule Tribe status pe tura order a chhuah chu a khing let bawk.