Nagaland CM Neiphiu Rio kaihhruai NDPP-in UCC dodal

Nagaland Chief Minister Neiphiu Rio kaihhruai Nationalist Democratic Progressive Party (NDPP) chuan Uniform Civil Code (UCC) hman tumna chu an dodal tih Ningani khan an sawi.

June 14-a 22nd Law Commission of India (LCI)-in public notice a tihchhuah chungchangah, UCC chu minority leh tribal hnamte zalenna leh chanvo rapbettu a nih NDPP chuan a ring, tih sawiin, "Nagaland chu sorkar laipui nena inremma siam a nih hnuah state puitling 16-na atan hlan kai a ni a, Naga hnamte chu Article 371 (A) hnuaiah hmanlai aṭanga an khawsakzia leh chin ṭhante ven himsak an ni," tiin an sawi.

NDPP chuan UCC hman tumna chu thil atthlak a ni tih sawiin, Indo-Naga inremna siam tum leh,kum 26 chhung sorkar laipui nen boruak ṭha tak an neih mek hi UCC chuan a tiderthawng dawn a ni tih a tarlang.

"Hun rei tak tihduhdahna leh thisen chhuahna lo tuar tawhtu Naga hnamte hian inremna tluantling an duh, mahse, dan thar siam chuan mipuiah ngaihṭhat lohna a thlen bakah, boruak ralmuang a ti chhe thei," tiin NDPP chuan an sawi.

India chu mimal zahawmna, inpumkhatna leh rampum zahawmna hum himtu, secular leh democratic Republic a ni tih sawiin NDPP chuan, "Ram chhung mipui zawng zawng tana inkaihhruaina pakhat siam tumna chu ram tana hlauhawm a ni a, inṭhen darhna a thleng zawk dawn," an ti.

NDPP hian a ṭum hnihna atan BJP thawhpuiin, Nagaland-ah sorkarna an chelh mek a, an party innghahna chu mipui chanvo leh custom leh tradition humhalh a nih angin UCC hman tumna chu an dodal tih an sawi. BJP kaihhruai sorkar laipui leh 22nd Law Commission member-te chu in ngaihtuah chiang tur leh 21st Law Commission thuthlukna thlak lo turin an ngen.