Manipur-ah Biak In leh chenna in hal leh

Manipur-a hnam leh hnam inkara buaina chhuak chu a la reh thei lo a, Meitei militant pawlte chuan Churachandpur district-a Langza leh Chinglangmei hmuna Kuki khuate chu nimin, Pathianni khan an bei leh. Chinglangmei hi Manipur khawpui Imphal chhimchhak lam km 70 vela hlaa awm a ni.

Militant-te hian Kuki volunteer pakhat, David Thiek chu a lu an tansak nia sawi a ni. Sanang bula Langza khua pawh beiin, Biak In leh chenna in ṭhahnem tak an hal bakah, mi panga an man bawk.

Meitei leh Kuki hnam inkara tualchhung buaina chhuak chuan ziaawm lam a la pan thei lo a, mi 160 chuangin nunna an chan tawh a, mi tam takin hliam an tuar.

Bishnupur district-a Khujuna Tabi khuaah pawh nimin zing vek khan, Kuki hnam nia rin te'n Meitei pathum an kap hlum bawk a ni.

Manipur CM-in Meitei-te'n beih an tawk tia a tweet paih leh nghal

Manipuir Chief Minister N Biren Singh chuan kar liam ta Zirtawpnia Chief Minister a nihna aṭanga a ban loh tur thu a sawi hnu lawkah, a twitter-ah 'Myanmar, Kuki mite'n Meitei-te an bei' tiin a ziak lang. A hnuah a tweet hi a paih leh nghal a ni.

CM Singh hian CM aṭanga a ban dawn loh thu a tweet-naa comment-tute a chhannaah he thu hi a sawi a, mahse, a delete leh vat a ni. Hetih lai hian Biren social media team chuan he tweet hi CM leh a team-te ziah a ni lo niin a sawi.

Tualchhung buaina thleng chungchanga lungawi lote'n Prime Minister Narendra Modi lim an hal chu ti tawh lo turin CM hian a ngen bawk. PM Modi chu an state in hmasawnna a neihna kawnga mi pawimawh tak a ni tiin, "Hun harsa tak kan tawn mek laiin kan hruaitu ṭhenkhatte lim hal a ni. Ka lim an hal a nih chuan pawi ka ti lem lo a, mahse, eng vangin nge Prime Minister lim an hal ve kher? Eng thil nge a tih? PM hi Manipur-a hmasawnan tam tak thlentu a ni," a ti. State chhung stakeholder hrang hrangte chu boruak ṭha a awm theihna atana thawkho turin a ngen bawk.

Assam CM hi inrawlh lo se a ṭha zawk : Chidambaram

Congress party hruaitu hlun, P Chidambaram chuan Assam Chief Minister Himanta Biswa Sarma-a'n Manipur chungchang a sawina chu nimin khan chhangin, Manipur buainaa CM Sarma inrawlh loh chu a ṭha zawk a, a inthiarfihlim a ngai a ni, a ti.

Assam CM Sarma hian Inrinni liam ta khan chanchinthar lakhawmtute a kawmnaah, Manipur tualchhung buaina thleng mekah, sorkar laipui leh Manipur sorkarin boruak ṭha siam tura hma an lakna avangin, ni 7-10 hnuah boruak a ṭhat chhoh tawh mai a rinawm thu a sawi. Congress party chu boruak a muanawm tawh hnuah Manipur state chu vei anga langa puhin a bei zui bawk.

Chidambaram chuan Assam CM chu Manipur buainaa a lo inrawlh ve loh a ṭhat zawk a rin thu a sawi bakah, Manipur CM chu bang se, thla rei vak lo tal President's Rule hnuaiah dah se an state tan a ṭha zawk dawn niin a sawi.