Hmarchhak state ṭhenkhatin UCC duh lo

Prime Minister Narendra Modi-a'n ram pumah dan ang khat, Uniform Civil Code (UCC) hman vat a duh thu a sawi hnuah hemi chungchang hian buaipui leh sawi zui a hlawh chho mek. UCC hman duh lo eng emaw zat an awma, eptu party ṭhenkhat UCC thlawptute pawhin BJP kaihhruain sorkarin UCC kalpui a tum dan chu an thlawp lo thung.

Hmarchhak state ṭhenkhatah pawh pawl hrang hrangin UCC hi duh loin an dodal a ni.

Nagaland :

Nagaland-a Transparency, Public Rights Advocacy leh Direct-Action Organisation-te chuan Uniform Civil Code hman chu constitution-in dikna chanvo a pek palzutna a nih thu leh, Naga mite nunphung leh nihna tibuaitu tur a ni tiin UCC hman an duh loh thu an sawi.

Pawl pahnihte hian an state sorkar chu sorkar laipuiin a nawrna avanga UCC bill a pawm a nih chuan an MLA 60-te ina kal chilha an quarter-te pawh hal an pawi tih loh tur thu an sawi a ni.

Kum 2022-a BJP-in national language atana Hindi hman a tum chungchang pawh sawi chhuakin, Kristian tamna state-a political party, Nagaland's Rising People's Party chuan UCC an dodal thu hi an sawi bawk a, dan inang khat hman tumna phena thil awm chu an duh lo tiin an sawi. UCC chu Rashtriya Swayamsevak Sangh (RSS) thil tum, "One nation, one religion, one language" tihpuitlinna tur kawng a ni, an ti.

Meghalaya :

Meghalaya-ah pawh Hynniewtrep Youth Council chuan thuchuah siamin Law Commission hnenah UCC an duh lohna thlen an tum tih an sawi.

"UCC hian hnam zia leh hnam dan bakah, constitution-a sixth schedule a bawhchhia a ni," tiin an President, Robertjune Kharjahrin chuan a sawi. "Constitution hi India mipuite tan a ni a, politics-a mi ṭhenkhat thil tihtheihna hmanrua tur a ni lo. UCC hi hman a ni dawn a nih chuan mipuite hnenah UCC nihna leh a tumte hi chiang takin an hrilh phawt tur a ni a, mipuite hian chiang takin an hre phawt tur a ni," tiin Civil Society Women’s Organisation president Agnes Kharshiing pawhin thuthar lakhawmtute a kawmnaah a sawi a ni.

Sikkim :

Sikkim-a Joint Action Council chuan Pathianni khan symposium buatsaihin he hunah hian party hrang hrang bakah pawl leh mimal angin UCC chungchang sawiho. Kal khawmte hian resolutiom pass-in, Sikkim tana UCC hman chu thil ṭul leh chakawm ber a ni lo tiin Sikkim-a UCC hman an duh loh thu an sawi.

JAC Vice-President, Passang Sherpa chuan, "Article 371F leh Sikkim-in customary law kan neihte behchhanin resolution pass a ni a, Sikkim-a UCC hman hi tul kan ti lo a ni. Constitution hnuaiah Article 371F hmangin chanvo ṭha tak kan nei a, chu chuan May 16, 1975 hmaa dan kan hman zawng zawng, misual hremna, mipui inkaihhruaina tur leh inneih dan thlengin hman min phalsak a ni. Kan dan zawng zawngte venhimsak kan ni a, Sikkim mipuite tana constitution-in a pek chanvo zahawmna tibawrhbang zawnga dan siam leh hi kan duh lo a ni," a ti.

Hmarchhak biala Kristian tamna state - Meghalaya, Mizoram leh Ngaland-ah UCC duhlohna hi a nasa zual a, state dangte erawh chuan thutlukna an siam hmain UCC draft hmuh phawt an duh thung.

Hmarchhak bial hi hnam hrang hrang inpawlh tamna bial zinga mi niin, hnam leh leh chi 220 chuang an awm. Hmarchhak biala chengte chuan constitution-in zalenna a pek leh an hnam chanvo a humsak angin UCC hian an hnam dan leh hraite humsak loin, a tihralsak an hlau a ni.