Assam Congress MP-in Parliament-ah Manipur chungchang sawiho phut

Assam-a Congress MP Pradyut Bordoloi chuan state chhunga Parliament member dangte chu party hrang hrang an nihna dah ṭha a, Manipur tualchhung buaina thleng mek chungchang Parliament-a sawiho a nih theihna atana hma la turin a ngen.

Lok Sabha MP Bordolai chuan July 20-ah Parliament Monsoon Session ṭan a ni dawn tih sawiin, he hunah hian Manipur-in harsatna a tawh mek hi sawiho a nih theihna tura an aw chhuah ṭheuh tura ngenin, state chhunga MP dangte chu lehkha a thawn vek thu a sawi. MP a nihna chu Manipur-in harsatna a tawh mek chungchang ram pumin an ngaihvenpui theihna tur platform atana hmang turin a ngen a ni.

"May 3 aṭangin hmarchhaka Manipur state-ah hian buaina nasa tak chhuakin, hmun tam takah tharum thawhna nasa tak a thleng a, human rights palzut a ni a, pawisawi lo tam takin nunna an chan bawk a ni. Manipur boruak hi a la ṭha lo hle a,chi leh chi inkara buaina hi a zual zel a ni," tiin MP dangte hnena ngenna a thawnah hian a ziak.

Congress party chuan Parliament session lo awm turah Manipur chungchangah sawiho an phut tur thu an lo sawi tawh a, eptu MP ṭhenkhat pawhin Parliament Committee chu Manipur dinhmun hi sawiho tura phut bawk. Congress chuan Manipur-in buaina a tawh mek chu BJP leh inpumkhatna tichhe zawnga policy ṭha lo tak a kalpui vangah a puh.