Manipur : Vawiin aṭangin Class 1-8 tan school hawng dawn

Manipur tualchhung buaina chhuak avanga hun eng emaw chen school khar a nih hnuin, vawiin aṭangin Class 1-8 tan school hawn ṭan a ni tawh dawn.

Chief Minister N Biren Singh chuan Thawhlehnia press conference a neihah school hawn a nih tur thu hi a sawi a, "Meitei leh Kuki loneitute'n an hna an ṭan leh theih nan phai leh tlang vela bunker siamte ṭhiah vek a ni ang a, ven himna khauh zawka kengkawh turin sipai kan dah belh bawk ang," tiin a sawi zui bawk.

Manipur tualchhung buaina thunun tur hian Army bakah central force eng emaw zat tirh luh an ni tawh. Buaina hian thla hnih a awh tawh avangin mipui nunphung a tibuai nasa hle a ni. Buaina kaihhnawihah hian mi eng emaw zatin hliam tuarin nunna chan mi 100 chuang an awm tawh bawk a, in leh sakhaw hmun eng emaw zat hal leh tihchhiat a ni bawk.

Chief Minister chuan Manipur-a hnam hrang hrangte chu lungrual leh pumkhata awm a ṭul thu sawiin, "Inlungrual takin kan lo khawsa ho tawh a, kan chhunzawm zel dawn a ni," a ti. Tualchhung buaina avanga in leh lo tlanchhiat sante tan pawh an awmna tur ngaihtuah mek a ni tih sawiin, relief camp-a khawsa mekte chu thla khat chhungin an chenna tur sak hman an tum tih a sawi. Relief camp hrang hrangah hian mi 50,000 vel an la khawsa mek a ni.

Kuki pawl hotu chenna in halsak

Kuki pawlte'n Meitei leh tribal-te inkara buaina a chhuah hnua Dimapur-Imphal National Highway-2 an dan chu Thawhṭanni khan an titawp a, kawngpui dan an tihtawp hnu lawk, Thawhṭanni zan khan Kuki pawl hotu pakhat chenna in chu misualte'n an halsak.

Tribal body Indigenous Tribal Leaders Forum (ITLF) chuan Thawhṭanni zan khan Churachandpur aṭanga km 5 vela awm, Songpi-a Kuki National Organisation (KNO) spokesperson Seilen Haokip in chu misualte'n an halsak tih a sawi a, a kawta a car ding pawh a kang chhe ve bawk. Hliam tuar erawh an awm lo nia sawi a ni. A in awmna hi a fal deuh avangin hmun dang kangkai loin an ṭhelh thei hi Haokip chuan a sawi.

SC-in July 10 hmaa status report theh lut turin hriattir

Supreme Court chuan Manipur sorkar hnenah an state-a buaina thleng mek thunun tura hma a lak dan leh, harsatna tawkte chhawmdawlna kawnga a hmalak dan kimchang chu July 10 hma ngeia report theh lut turin a hriattir.

Chief justice of India DY Chandrachud leh justice, PS Narasimha leh Manoj Misra awmna bench hian Thawhṭanni khan tualchhung buaina chhuak chungchanga Kuki-te petition theh luh a ngaihtuah a, he hunah hian Manipur sorkar aiawhin solicitor general Tushar Mehta a inlan. Mehta chuan petition theh lutte aiawh, senior advocate Colin Gonsalve hnenah an state-a thil thleng mek chu a chi bing leh sakhaw bik zawng anga kalpui lo tura ngenin, bench hnenah tualchhung boruak chuan zawimuangin ṭhat lam a pan chho zel tih a hrilh bawk.

Hetih lain Gonsalve chuan Manipur sorkarin court hnena buaina tireh tura hma lak a intiam reng chungin, a intiam tirah buaina chhuak vanga Kuki hnam thi mi 10 an awm chu, Pathianni khan mi 110-ah an pung chho tawh a ni, a ti.

Churachandpur-ah health camp buatsaih

Rural Women Upliftment Society (RWUS) chuan Churachandpur Hospital leh private practitioner-te nena thawkhoin, Thawhṭanni leh nimin khan Churachandpur-ah tualchhung buaina chhuak vanga in leh lo tlanchhiat san, relief camp-a khawsa mekte tan health camp an buatsaih.

Health camp-ah hian Churachandpur Hospital-a doctor pahnih leh private doctor pahnihte chuan dam lote enin, RWUS hian dam lo in entirte hnenah a thlawnin damdawi an sem vek bawk a ni.