Manipur : Security force-te silai hmeh puahah mi 1 a thi

Manipur-ah Thoubal district-a Khangabok-ah Thawhlehni khan Meitei mipui thinrim pung khawmin Khangabok-a 3rd Indian Reserve Battalion (IRB) Camp luhchhuah an tum a, sipaite'n mipui hnawh darhna atana silai an hmeh puahah Meitei civil mi pakhat a thi. Hliam eng emaw zat an awm.

Mipui thinrim pung khawmte hian security forces-te chu anmahni veng him zo loah puhin, militant-te laka an invenhimna tur silai leh silai mu pek phutin IRB camp hi luhchhuah an tum a ni. IRB mi leh sa leh security force-te chuan mipui hnawh darh nan tear gas, smoke bomb leh silaite an hmang a, Rapid Action Force leh Assam Rifle-te pawh helai hmunah hian tirh nghal an ni bawk.

Tun hnaia militant nia rinhlelhte'n Manipur Valley district-a mi an beih hnuah, mipui hi pung khawmin, security force-te hnena silai leh silai mu an theh luh tawhte chu pek kir leh an phut.

IRB mi leh sate'n an kah hlum hi Abujam Ronaldo niin, kum 27 mi a ni. Thoubal District hospital an panpui laiin a boral. Mipui thinrim chuan Samaram Makha Leikai hmuna IRB Irengba Rupachandra in chu an hal a, district hmun hrang hrangah nawrh huaihawtin, Imphal-Moreh kawng NH-102 pawh an dang zui bawk. Khangabok hmuna Assam Rifle-ho Gypsy pawh mipui thinrim hian an hal a ni.

He thil thleng avang hian Thoubal District Magistrate chuan curfew thlahdul hun chhung pawh a titawi nghal bawk.