July 8 aṭangin Greater Tipraland movement kalpui dawn

TIPRA Motha chairman, Pradyot Kishore Manikya Debbarma chuan an party chuan July 8 aṭangin 'Greater Tripraland' movement an kalpui dawn a, Tripura West District-a Madhab Bari hmun aṭangin bul an ṭan dawn tih a sawi.

Pradyot hian ni hnih kal ta khan TIPRA Mortha hotute'n Union Home Minister Amit Shah hmuin, Greater Tipraland an beisei thu an thlen tih a sawi bawk.

IPFT-in 2018 kuma an tihsual ang chu TIPRA Motha chuan thlentir an tum ve lo tih sawiin, Pradyot chuan tribal community-te harsatna leh thil phutte an ngaihthah dawn loh thu a sawi.

Pradyot chuan an thil phutte tihhlawhtlin hmaa sorkar an zawm chuan, an thil phutte a hlawhtling ngei dawn em tih sawi lawk a ni thei dawn lo a ni, a ti. Mimal hamṭhatna turin mipuite a phatsan dawn loh thu a sawi.

TIPRA Mortha chairman chuan tharum thawhna tel loa sorkar nawr a pawimawh rualin, an thil phutte a ngaihpawimawh nan nawr nat erawh a ṭul tih a sawi bawk.