AP : Class X leh XII topper-te hnena laptop pek a hman tlak loh

Arunachal Pradesh-a Tirap district admnis­tration-in mi 9 telna technical expert committee a din chuan Tirap district-a CBSE exam-a topper te hnenah sorkar-in laptop chhia a pe nia puhna chungchang a chhui chian hnuah, laptop dawnte chu laptop hlui a nih bakah hman tlak loh a ni tih a finfiah.

Education depart­ment chuan June 20 khan CBSE-in kumina exam a buatsaihnaa Class X leh XII zirlai tiṭha 18-te hnenah laptop hi a pe a ni. Directorate of Secondary Education (DSE)-in a buatsaih District Academic Toppers Award 2021-22 kalpuina peng khat atan laptop-te hi pek an ni a, mahse, zirlai pariatin an laptop dawn chu a hlui a nih bakah, a hman tlak loh tiin an pe kir a, a hmelhem nasa tawh niin an sawi.

Tirap deputy com­missio­ner Hento Karga chuan hemi chungchang chhui chiang tur hian expert committee a din a, circle officer-in committee hi a ho a ni.

Karga chuan, "State sorkar chuan laptop chhiate chu a tharin a thlak dawn. Hetiang thil zahthlak hi a thlen tawh lohna turin, laptop tharte chu zirlaite hnena pek an nih hmain uluk takin en fiah an ni ang," a ti a, education department-te pawhin laptop chhia an leina chu an blacklist dawn tih an sawi bawk. Laptop supplier hi tender tihchhuah hnuah thlan a ni.

All Tirap Students’ Union (ATSU) chuan he thil thlenga mawhphurtu chhui chhuah phutin, Thawhṭanni khan DDSE hnenah memorandum an theh lut bawk.