NSCN-IM-in Manipur-a Biak-In tihchhiatte sa ṭha leh turin ngen

National Socialist Council of Nagaland - Isak-Muivah (NSCN-IM) hnuaia awm, Council for Nagalim Churches (CNC) chuan Nilaini khan Manipur mipuite hnenah open letter thawnin, tualchhung buaina chhuak avanga Pathian biakna hmun tihchhiatte chu sa ṭha leh turin a ngen.

Open letter-ah hian CNC chuan, "Biak In tihchhiatte hian kan rilru a luah a ni. Sakhua inzahsak lohna awm hi tihreh hlen a ṭul. Biak In tihchhiatte hi sak ṭhat an nih leh theih nan, Biak In awmna hmun hi a neitu dik tak, Meitei an ni emaw Kuki an ni emaw, pek kir leh vek ni rawh se," tiin a ziak.

Buaina a chhuah hnuah an Biak In awmna hmun, Kristiante ram hi neihsak tum mi tam tak an awm tih sawiin, "Meitei hnamte chungah khawvel mit a fu mek a, hnam puitling leh zahawm an ni tih khawvel hmaa an lantir a ngai. Meitei hnam zawng zawngin an hriat ṭul chu, Meitei Biak In 236 hal a ni hian Meitei zingah Vaishnavaite Hinduism leh Sanamahism sakhua chauh ni lo, sakhaw dang vuantute an awm tih a tichiang. Hei hi inpuhna ringawt ni loin, thudik a ni," tiin CNC chuan an tarlang.

Manipur state chhungah boruak ralmuang a awm leh thuai an beisei tih sawiin, "Meitei radical-te'n Meitei leh Kuki Kristiante an rikrap ṭhin pawh hi tihreh a ṭul. Tharum thawhna tireh turin inhriatthiam tawnna leh mahni mihringpui inzahtawnna neih a ṭul tak zet," tiin NSCM-IM church body chuan a sawi.

NSCN-IM chuan Biak Inte chu hnam bil thil a ni lo a, sakhaw zalenna a lantir zawk tih sawiin Manipur Chief Minister Biren Singh kaihhruai BJP sorkar chu Imphal Valley-a Biak In te hal a nih laia a ngawih reng chhan an zawt. Tualchhung buainain a nghawng zawng zawngte an tawrhpui thu an sawi bawk.

May 3-a Manipur-a Meitei leh tribal-te inkara buaina a chhuah hnuah, state chhung hmun hrang hranga Kristian Biak In 253 hal a nih thu Indigenous Tribal Leaders’ Forum chuan an lo tarlang tawh a ni.