CPI leh CPI(M) MP-te'n Manipur an tlawh

CPI(M) leh CPI MP-te chuan Manipur mipuite thlamuan tur leh state chhung boruak zir chiang turin nimin khan Manipur an tlawh a, July 8 thleng an cham ang.

Left Party pahnihte hian Manipur an tlawh tur thu thuchhuah inṭawm an siamah, central leh state-a BJP sorkar chu sawiselin, "State leh central sorkar chakna hmanga rorelna ṭha an tiam chu a hlawhchhamzia a ruh langin a lang a ni," tiin an sawi.

BJP kaihhruai sorkar chu eptu pawlte thu leh hla ngaithla duh lo leh, Manipur-a buaina chin fel ai chuan Maharashtra state buaipui zawkah puhin, "Manipur mipuite zingah state chhunga boruak ralmuang a awm leh thuai duhna a lian a, Chief Minister chu inṭhen darhna thlentu leh office luah tlak loa ngaia paih thlak duhna a lian hle bawk," tiin an tarlang.

June 25-a Manipur buaina chin fel duhtu, ngaihdan thuhmun nei political party 10 leh Manipur-a Zilla Parishad member-te inhmuh khawmnaah khan left party pahnihte an tel ve ve tih an sawi. Hemi hnu hian CPI leh CPI(M) chuan Manipur-a nunphung pangngai a awm leh theih nana thuneitute be rawn tur leh state chhung boruak hre chiang turin party MP panga tirh an rel a ni, an ti.

Ruahmanna an siam ang chuan vawiin tlai 5:00 hian Governor an hmu ang a, July 8-ah chanchinthar la khawmtute an kawm bawk ang.

Manipur-a zinte hi CPI(M) party aṭangin Bikashranjan Bhattacharya leh John Brittas (Rajya Sabha MP), CPI party aṭangin Binoy Viswam, Sandosh Kumar P (Rajya Sabha MP) leh K. Subba Rayan (Lok Sabha MP)-te an ni.