Brahmaputra luiin hlauh-awm chhinchhiahna pel

Ni nge emaw zat ruah nasa taka a sur chhunzawm reng vangin Brahmaputra lui leh a peng hrang hrangte an len belh zel a, Guwahati-ah pawh Brahmaputra lui tui hian hlauhawm chhinchhiahna a pel tawh a ni. 

Tui lian hian Guwahati  khawchhunga hmun hniam lamte a chim nasa a, mi tam tak chu an in chhuahsanin kawngpuiah te an khawsa mek. 

Central Water Commission chuan ni 3-4 liam ta aṭangin Brahmaputra water level hi a san belh reng tih a sawi a, Guwahati-ah chuan hlauhawm chhinchhiahna chu cm 7 chuangin a pel tawh a ni, a ti. 

Kamrup (Metro) district thuneitute chuan September 28 aṭang khan Guwahati leh district chhung hmun dangah  lawng service a titawp. 

Assam State Disaster Mana-gement Authority (ASDMA) in a report danin, tuilian hi district 10 - Nagaon, Dhemaji, Biswanath, Morigaon, Jorhat, Majuli, Kamrup, Sivasagar, Dibrugarh leh Tinsukia district-a mi nuai 3.07 velin an la tuar a ni. Thlai chinna ram hectare 14,142 a zau pawh tuilian hian a tichhe tawh a, district  hrang hrangah thingtlang khaw 337 chu tuilian hian a la chim mek bawk.