Tripura sorkarin Rs vbc 85 hu project a pawm

Hripui leng vangin sorkarin sum lamah harsatna tawk mah se, Tripura Infrastructure and Investment Fund Board chuan project thar 20, cheng vaibelchhe 85 hu a pawm. 

Project pawm tharte hi leiṭha leh thlai chi supply chain tihchangtlunna tur te, Agartala-a NIT bula driving training leh research centre dinna tur, sewerage system tihchangtlunna tur, Lichubagan - Maharaja Bir Bikram Airport kawng cheiṭhatna tur, Howrah-a infrastructure building siamna tur leh consultancy service siamna tur, Nazrul Kalashetra thuam ṭhatna tur, GB Patn Hospital-a plasma lakkhawmna tura CTVS unit dinna tur leh lift siamna turte an ni. 

Project thar chungchang ngaihtuaha meeting hi chief minister Biplab Kumar Deb chuan a kaihruai a, state mipuite tana infrastructure building ṭha a pawimawh thute an sawiho a ni. Hemi rual hian healthcare, drinking water, electricity leh connectivity-te ngaih pawimawh a ṭul thu an sawi bawk. 

Chief secretary Manoj Kumar chuan sorkar thar a  din khan project eng emaw zat, zawh fel hman loh a awm thu sawiin, heng zinga  50% chu board chuan a thawk zo tawh a, a bak  la awm  hi sorkar kum kal mek chhungah zawh fel hman tum a ni, a ti. Board hian project 125 a thawk zo tawh a ni.