Nagaland-ah trucker association pangain nawrh huaihawt

Nagaland-a trucker association panga,  Dimapur District Truck Owners’ Association, Dimapur Truck Drivers’ Union, Dimapur District Truck Drivers’ Welfare Trade Union, Lahorijan & Khatkhati Truckers’ Welfare Society leh Bokajan Truck Owners’ Association chuan Thawhlehni aṭang khan tiam chin awm loin nawrh an huaihawt. 

Nawrh huaihawtte hian September 22-a IMC Hall Dimapur-a driver kahhlum, Jiten Gogoi chhungte hnena zangnadawmna pe turin sorkar an phut a, hei bakah truck driver-te hnen aṭanga pawisa phut leh lakluih sak an ni ṭhin chu tihtawp an phut bawk. Truck association-in nawrh an huaihawt vang hian Nagaland-a lut leh chhuak tur truck tam tham tak chu kawngah an tangkhang mek a ni. 

Commissioner of Police (CP) Dimapur Rothihu Teteseo chuan truck driver thah chungchang hi chhui mek a nih thu leh, rinhlelh mi 19-te chu thu zawhfiah an ni tawh a, mi ṭhenkhat hren mek an ni bawk tih a sawi. Pawikhawihtu pawh hriatchhuah thuai a nih an beisei tih a sawi a ni.