Manipur Governor-in relief camp viltu tur team din; Team member-ah Kuki MLA-te telh an ni ve lo

Manipur governor Anusuiya Uikey chuan, state chhunga buaina chhuak tuartute tana district pariata relief camp dinte viltu tur, minister leh MLA-te awmna team pasarih a din. Mahse heng team-ah hian Kuki MLA-te telh an ni ve lo.

Governor-in team a dinah N Biren Singh kaihhruai sorkara Council of Minister zawng zawngte bakah, MLA ṭhenkhat leh khawtlang hotu ṭhenkhat ruat an ni. Kuki hnam zinga minister pahnih leh MLA pariatte erawh chu team-ah hian telh an ni lo.

Kuki hnamte hian Manipur sorkar chu Chin-Kuki-Zomi tribal-te venghim zo loah puhin, inrelbawlna hran neih an duh thu sorkar hnenah hian an lo thlen tawh a ni.

Governor-in relief camp viltu tur team a din zinga Kuki MLA-te a telh ve lo chu mi ṭhenkhatin an sawisel. Governor chetdan hian Kuki hnamte enhrang tura inzirtirna tichhuakin, hei hian hnam pahnihte inkara boruak ṭha lo awmsa hi a tihzual a hlauhawm niin an sawi.

Governor chuan a thuthlukna chu sawifiahin, relief camp-te chu thlei bik nei loa an inrelbawl theihna tura thuthlukna siam a ni tih a sawi. Hemi chungchanga an sawi duhte sawipui turin Kuki hotute chu hmuh a inpeih reng tih a sawi bawk.

Khawtlang mipui zawng zawng chu boruak ralmuang leh nunphung pangngai a awm leh theihna tura thawkho turin Governor chuan a ngen. State aiawh tura mipui thlan tlinte hnenah pawh buaina chingfel tura theihtawp chhuah tur leh, inbiakna mumal tak neia inrem theih dan kawng dap turin a hriattir bawk a ni.

Kar liam ta Zirtawpni khan Governor hian Imphal West district-a Manipur Trade and Expo Centre, Lamboi­khongnangkhong-a relief camp siam a tlawh a; he hmunah hian Kangpokpi, Kakching leh Churachandpur district aṭanga tlanchhia mi 548 an khawsa mek a, an zinga 157 chu naupang an ni.