Assam-a Dhemaji district-in tuilian la tuar

Assam-a Dehmaji district chuan tuilian an la tuar a, mi 18,000-te chuan harsatna an la tawk mek a ni.

Tullian hian district-a revenue circle pali hnuaia thingtlang khaw 48-te a la chim a, thlai chinna ram hectare 530.07-a zau a chim chhe tawh bawk.

Ni eng emaw zat nasa taka ruah a sur avangin Brahmaputra lui leh a peng hrang hrangah tui a lian a, district chhung hmun eng emaw zat chu tuiin a chim thar leh a ni. Tuilian hian Silapthar Model Hospital-a campus pawh a tibuai a, damlo leh hospital staff-ten harsatna an tawk a ni.

Dikari lui tui lian chuan Jamuguri, Siyari, Uluwani, leh Tatiguri bakah khaw dang eng emaw zat a chim bawk.

Assam State Disaster Management Authority (ASDMA) chuan Gogamuk revenue circle hnuaiah mi 8,000 dawnin tuilian hi an tuar a, Sissoborgaon revenue area-ah mi 7,400-te a nghawng bawk tih a tarlang.

Inrinni liam ta khan Assam Water Resources minister Pijush Hazarika chuan Dhemaji district hi tlawhin, Jiadhal leh Gai lui khuahna laite a enfiah a ni.

ASDMA chuan Jorhat district-ah Brahmaputra lui tui chuan hlauhawm chhinchhiahna a pel a, Nanglamuraghat-ah Disang lui leh Sivasagar-ah Dikhou luite chuan hlauhawm chhinchhiahna an pel bawk tih a sawi.

Assam tuilian hi district paruka mi 30,000 dawnin an tuar a, tuilianin thlai chinna ram a chim chhiat hi hectare 1,263.07 a zau a ni tawh. Kar liamta kar tir lam khan tuilian hian ziaawm lam a pan hman a, mahse nasa taka ruah a sur leh hnuah tuilian hian zual lam a pan leh a ni.