Tripura CM-in Bangladesh PM hnenah lakhuihthei a pe
Ram leh ram inkara inlaichinna ṭha siamna atan Tripura chief minister Manik Saha chuan Bangladesh prime minister Sheikh Hasina hnenah lakhuihthei kg 980 a pe tih sorkar official chuan Pathianni khan a sawi.
Bangladesh Prime Minister hian June 15 khan Tripura CM hi theihai kg 500 a lo pe tawh a; June 10 khan hmarchhak state dang chief minister-te hnenah pawh theihai a lo thawn tawh bawk. Theihai a thawn hi kg 3,000 zet a tling a ni.
Horticulture department director P B Jamatia chuan Inrinni khan Assistant High Commission of India, Chittagong office-ah an puala lawh lakhuihthei tui chi, 'Kew' an tih box 100 chu Bangladesh official-te hnenah a hlan.
Jamatia chuan, "Chief Minister hian inṭhianṭhatna lantir nan Prime Minister Hasina chu lakhuihthei kg 980 a thawn a ni. He thilpek kan pe thei hi ka lawm hle," tiin a sawi.
'Kew' lakhuihthei hi a tui bik a, a rim leh a pianhmangah a danglam bik tih a sawi bawk.