Manipur : Tangkhul Naga-te'n Ukhrul-a relief camp siam duh lo

Hmarchhak biala Tangkhul Naga pawl lian ber, Tangkhul Naga Long (TNL) chuan Manipur-a Ukhrul district-a relief camp siam an duh lo.

TNL hian Pathianni khan Manipur sorkar hnenah, sorkarin tualchhung buaina thleng avanga mahni in leh lo tlanchhiat sante tana awmna tur a siam, relief camp chu Ukhrul district-ah hian siam ve lo turin an ngen. TNL President David K Shimray chuan, Ukrhul district-a semi-permanent relief camp-ah chuan district dang aṭang tlanchhiate dah an ni ve tur a ni lo, a ti bawk.

Shimray chuan, "Manipur sorkar chuan state chhungah remna leh muanna a awmna turin, hmun danga tlanchhiate chu an in leh lo awmna lama an kir leh theihna turin policy a siam a ngai a ni," a ti. District dang aṭanga tlanchhiate Ukrul district-ah dah an nih chuan, TNL chuan a ṭul angin hma a la dawn a, harsatna a thleng a nih pawhin state sorkar chu mawhphurtu a ni ang, tiin a sawi.

Hemi hma hiana hnam 20 intel khawmna, United Naga Council (UNC) chuan Manipur-a Kuki leh Meitei inkara buaina thleng chuan, Naga hnam ṭhenkhatte a nghawng a, vau leh beih te an tawh phah niin a lo sawi tawh bawk. Hnam pahnihte inkara buaina chhuak mekah, Naga-te chu neutral taka an awm thu sawiin, Manipur-a buaina chhuakah Naga hnam chu hnuk lut lo turin an vau bawk a ni.

Manipur High Court-in internet service pe tawh turin hriattir

Manipur sorkarin May 3-a tualchhung buaina a chhuah hnua state puma internet service a tihtawp chu chhunzawm zel a la ni a, hetih lai hian Manipur High Court chuan state sorkar hnenah internet service chu eng emaw chen tal pe tawh turin a hriattir.

Justice Ahanthem Bimol Singh leh A Guneshwar Sharma awmna, Manipur High Court division bench chuan hun rei tak chhung internet service tihtawp a nih chungchang hi ngaihtuahin, he thutlukna hi a siam a ni.

Court chuan Manipur Home department chu mipuite tana internet hawng leh tawh tur leh, Internet Lease Lines (ILL) emaw a ṭul chuan Fibre to Home connection pawh pe tawh turin a hriattir. A ṭul chuan sorkarin state himna tur ngaihtuah chungin a him chin nia a hriatte mobile phone chu internet hmang leh thei tawh tura buatsaihin, en chhinna nei turin a ti bawk. .

Leased line internet connection hi broadband ang lo deuhin, a hmangtute'n line khat inṭawmin an hmang a, Fibre to Home erawh broadband ang tho niin, broadband ai erawh chuan internet connection hi a chak zawk a ni.

Kangpokpi-a inbeihnaah police 1 a thi

Manipur-a Kangpokpi area-ah Pathianni zan khan inkahna a thleng leh a, police pakhat a thih bakah mi 10 velin hliam an tuar.

Official-te sawi danin Kangpokpi district-a Khangchup area-a thingtlang khuate chu beih an ni a, zing dar 3-6 vel khan thawm a dai a, mahse, a hnuah Phayeng leh Singda khuaahte inkap thawm hi hriat leh a ni, an ti. He inbeihnaah hian thi dang pawh an awm rin a nih thu an sawi a, mahse, inbeihna a tawp hma chu an dinhmun dik tak erawh hriat theih a ni rih lo tih an sawi.