KSU-te'n Khliehriat-a rel kawng siam tur an duh lo

Meghalaya-a Khasi Students’ Union (KSU), East Jaintia Hills District unit chuan state sorkarin Khliehriat pawh tura rel kawng siam a tumna chu an duh lo.

Chief Minister Conrad Sangma chuan East Jaintia Hills headquarters, Khliehriat pawh tura rel kawng siam tum chu zir chianna an neih vek tawh thu sawi mah se, KSU hian sorkar hmalakna hi dodalin, a ram mite dinhmun leh himna tur pawh uluk zawka ngaihtuah a la ngaih laiin, pawn lam mi tam tak tana luhna tur awlsam, Khliehriat-a rel kawng siam hi an duh loh thu an sawi a ni.

KSU hian an duh dan sawipuiin Deputy Commissioner an lo kawm tawh a, DC hnenah hian lehkha theh lutin, Bangladesh leh an chhevel state aṭanga pawn lam mi lut tur venna atana dan khauh tak siam a nih phawt loh chuan sorkarin rel kawng a siam tur chu an dodal tur thu an sawi a ni.

Lehkha theh luhah hian KSU chuan rel kawng siam chu hmanhmawh lo tur leh, kawngpui ṭha zawk an mamawh thu te, service sector dang leh zirna leh healthcare lamah te ṭan lak a ṭul hmasak thu an sawi. "KSU chuan hnam tlem leh ram mite venhimna tur dan khauh zawk siam a nih hma chuan rel kawng siam tur hi kan dodal tlat dawn. Sorkar thil tum hi 1988 aṭang khan kan dodal tawh a, ruahmanna thar siam a nih hma chuan kan dodal chhunzawm zel bawk ang," tiin an sawi.

KSU hian Tetelia aṭanga Byrnihat rel kawng siam tur an lo dodal tawh a, rel kawng siam hi 2016 khan titawp a lo ni tawh a ni. Tuna Khliehriat-a rel kawng siam tur an dodalna chu Jaintia Hills Autonomous District Council (JHADC) thuneitute pawhin an thlawp ngei an beisei thu an sawi bawk. JHADC CEM Thombor Shiwat hmuin, North East Frontier Railway (NFR) hnenah No Objection Certificate (NOC) pe chhuak lo turin ngen an tum a ni.