Manipur Governor-in hnam hrang hrang hruaitute hmu turin PM ngen

Manipur governor, Anusuiya Uikey chuan Thawhṭanni khan an state-a tualchhung buaina thleng mek chu chinfel a nih a, boruak muanawm a awm leh thuai theihna turin prime minister Narendra Modi hnenah hnam hrang hrang hruaitute chu hmu tura a ngen thu a sawi.

Governor Uikey hian Thawhṭanni khan Kuki tamna, Kangkokpi leh Meitei tamna, Imphal East district-a relief camp-te a tlawh a, hemi ṭum hian PM hnena ngenna a thlen chungchang hi a sawi a ni. Relief camp-a chengte blanket-te a sem nghal bawk.

Tharum thawhna thlengte chu a dem thu sawiin, Governor chuan sorkarin Manipur-a boruak ṭha a awm theihna tura a hma lakna hrang hranga thawhpui turin mipuite a ngen. "Buaina chinfel a nih theihna turin kan theihtawp kan chhuah reng a ni. Security force-te pawh buaina chhuahna hlauhawm zualna hmunahte dah zel an la ni a, mahni in leh lo tlanchhiat sante tan pawh hmun hrang hrangah an awmna tur in sak mek a ni bawk. Harsatna tawkte hi zángnadawma pek an ni ang," tiin a sawi.

Manipur-a hnam leh hnam inkara buaina chhuak avanga mi 142 in nunna an chan hnu leh, chenna in tam tak bakah, biak in tam tak hal a nih hnuah pawh prime minister Narendra Modi chu eng ṭawngkam mah a la nei lo. Hei vang hian eptu party hrang hrang bakah, civil society organisation-te pawhin PM Modi hi na taka an sawisel fo a, tun thlenga Manipur buaina thleng chungchanga a ngawih tlatna chhan hi an zawt fo tawh a ni. Manipur tribal MLA-te chu PM hmuh tum hian New Delhi-ah pawh an kal tawh a, mahse, an hmu thei lo.

Union home minister Amit Shah chuan May 29-June 1 inkar khan Manipur hi tlawhin, organisation hrang hrang hruaitute a kawm a, hmalak a nih tur thute pawh a sawi. Mahse hemi hnuah pawh buaina hi a la reh lo a, inbeihna a la thleng zawm reng a ni. Mi tam tak chuan PM Modi chu Manipur buaina tireh tura inrawlh turin an phut a ni.

Manipur sorkar chuan Thawhṭanni khan Supreme Court-ah an state-a buaina chhuak avanga thi chu mi 142 tling tawhin, May 3 hnuah in leh building dang halsak report 5,000 a lut bawk niin a hrilh. Buaina chhuak avanga tlanchhia mi 60,000 chuang awmin, an zinga a tam zawk chu state chhunga relief camp 350 chuang siamah an khawsa mek a, hetih lai hian mi 12,000 dawn chu Mizoramah an tlanchhia niin a hrilh.

Fact finding panel member-te lakah FIR theh lut

Manipur tualchhung buaina chhuak zir chiang tura tlawhtu,National Federation of Indian Women (NFIW) fact-finding team chuan buaina chhuak chu state sorkar hriatpui, 'state-sponsored' niin an sawi. Hei vang hian panel member-te lakah hian FIR theh luh a ni.

Panel member-te NFIW general secretary Annie Raja, national secretary Nisha Sidhu bakah independent advocate Deesha Dwivedi-te an ni.

July 3 khan panel member-te hian press conference neiin, buaina chhuak hnam pahnih inkara buaina ringawt a ni lo a; ram, resources, militant-te thlengin a huam vek a ni, an ti. Manipur leh central-a BJP sorkar chu buaina tireh tura hma la ṭha tawk lohah an puh. Manipur chief minister N Biren Singh chu na taka demin, an state-a buaina chhuak chungchangah mawhphurhna lain, kar khat chhung khan banna theh lut ngei tur a ni, an ti.

Panel member-te lakah hian L LIben Singh chuan Imphal police station-ah FIR a thehlut a ni. Thu dik tawk lo sawi leh, mipui thlan sorkar paithlak leh, mipuite chu sorkar do tura fuihpawrh tumah a puh.