Shillong-ah zan dar 10 hnu lama dawr hawn khap

Tun hnaia Shillong khawpui leh a chhehvelah buaina chhuak a awm leh ṭhin avangin, East Khasi Hills district thuneitute chuan Thawhtanni khan Shillong khaw chhunga dawrte chu zan dar 10 hnu lamah hawn a khap.

Kar hmasa khan Shillong-a police station pakhat chu station kawta rui chunga intibuaite'n an bei a, station compound-a lirthei pali halin police station pawh hi an luh chilh bawk. He buaina kaihhnawihah hian district SP, Sylvester Nongtynger chuan mi panga an man tawh tih sawiin, buaina siamtu zinga mi eng emaw an la zawn chhunzawm thu a sawi.

Deputy commissioner RM Kurbah chuan,"Khawtlang leh mipui himna atan te, khaw chhung a lo ralmuan theih nan hmalak a ṭul a ni. Thuneihna pek ka nih angin Shillong khaw chhungah hian CrPC section 144 hi ka puang a, zan dar 10 hnu lamah reng reng dawr hawn phal a ni lo ang," tiin, zu in leh lirthei hmanga dan phal baka chet te leh zirna in, sakhaw biakna hmun leh damdawi in bul vela zan dar 10 pelha ring taka hla play-te pawh khap vek a nih thu a sawi bawk.

Thupek bawhchhia an mante chu IPC section 188 hnuaiah dan anga an chunga hremna lek kawh a ni dawn tih sawiin, tun hnaiah a bikin zan lama buaina chhuak a tam thu leh, dan bawhchhiatna a nasat thu a sawi a ni.