Activist, academic leh lawyer 1,500 chuangin Manipur tlawhtu fact-finding team laka FIR theh luh an dem

Manipur tualchhung buaina thleng chungchang zir chiangtu, National Federation of Indian Women (NFIW) fact-finding team member laka FIR theh luh chu India ram hmun hrang hranga human right activist, civil society leader, journalist, academic leh lawyer 1,500 rualte chuan an dem thu thuchhuah siamin an tarlang.

NFIW fact finding team hian Manipur-a thil thlengte an zir chian hnuah, buaina chhuak chu state sorkar hriatpui, 'state-sponsored' niin an sawi a ni. Hei vang hian team member pathum - general secretary Annie Raja, national secretary Nisha Sidhu,leh independent Delhi-based lawyer Deeksha Dwivedi-te lakah FIR theh luh a ni a, Manipur police-te chuan India sorkar dodal tura mipuite fuihpawrh tum, President/Governor-te an thuneihna hman luihtir tum zawnga nawr, ram inpumkhatna tichhe zawnga thuchhuah siam, hnam pahnihte inhuatna tihhluar tum leh intualvuakna thlentir tum zawnga thiltiah puhin thubuai an siamsak a ni.

Activist leh human rights body-te chuan thuchhuah inṭawm siamin, NFIW team laka FIR ziah luh chu sut tur leh, an laka FIR ziah luh a nih theihna atana dik tawk loa taka thiltitu police-te laka action lak an phut thu an tarlang.

Thuchhuah siamah mi 1,500 chuangin hming an sign a, an zingah hian advocate Prashant Bhushan, activist Kavita Krishnan, Amnesty India chief hlui Aakar Patel, Yogendra Yadav, Association for Democratic Reforms co-founder Jagdeep Chhokar, historian Ramchandra Guha-te pawh an tel.

European Parliament-ah Manipur chungchang sawiho

Prime Minister Narendra Modi-a'n July 14-a France Bastille Day lawmnaa guest of honour ni tura zin tura a inbuatsaih mek karah, European Parliament-in Strasbourg-a plenary session an neihah nimin khan Manipur-a tualchhung buaina thleng mek chungchang sawiho a ni.

Manipur-a buaina thleng mek hi “Debates on cases of breaches of human rights, democracy and the Rule of Law” tih hmangin chawhnu lamah an sawiho a, vawiin hian vote lain resolution an pass ang.

Parliamentary group paruk chuan Manipur-a thla hnih chuang buaina thleng tawh chungchanga Modi kaihhruai sorkar hmalak dan chu sawiselin, resolution siam turin motion hi an pu lut a ni. India sorkar chu na taka sawiselin, buaina thlengah mihring dikna chanvo palzut, zalenna rahbehsak, sorkar sawiseltute, civil society leh media-te thlenga beih an nih dante sawiin na takin India sorkar chu an sawisel. PM Modi kaihhruaina hnuaia democracy dinhmun chhiat chhoh dante an sawi lang bawk.

Motion pu luttu Parliamentarian-te hi Left, European Socialist leh Green bakah regional party te, Conservative leh centre-right political leh Kristian group member-te an ni.

TMC-in member 5 awmna team an tir dawn

West Bengal chief minister Mamata Banerjee kaihhruai Trinamool Congress (TMC) party chuan Manipur buaina chungchang zir chiang turin member panga awmna, fact-finding team a tir dawn. Fact-finding team-te hi July 14-ah Manipur an thleng ang.

Manipur-a an cham chhung hian, TMC team hian relief camp hrang hrang tlawhin, buaina chhuak tuartute an kawm ang. Manipur tlawh turte hi Derek O’Brien, Sushmita Dev, Kalyan Banerjee, Dr Kakoli Dastidar leh Dola Sen-te an ni.

BJP kaihhruai ve ve, sorkar laipui leh Manipur sorkar chuan inṭhendarhna politics an kalpui avangin hnam leh hnam inkar buaina hi a chhuah phah niin TMC party an sawi.