Meghalaya Minister Ampareen Lyngdoh-in beih a tawk

Meghalaya health minister Ampareen Lyngdoh chu Thawhlehni khan Laitumkhrah-a a chenna in pawnah chempui (Dao)-in beih a ni.

Pawikhawihtua puh, kum 46 mi Teibor Lyting hi Shillong khuaa Kharmalki hmuna mi niin, security guard-te inrin hmain Minister hi a bei tih police-te chuan an sawi.

Thil thlen dan chungchang sawiin Lyngdoh chuan, online meeting a neih laiin tukverh darthlalang keh ri a hriat avangin finfiah turin inhnuaiah a chhuk a, a pasal Fantin Lakadong chuan CCTV aṭangin pawn lama buaina thlirin, lung vawmtute chu hnawt bo turin pawnah an chhuak a ni.

Lyngdoh chuan anmahni beitute a hmuh veleh ring takin a au tih sawiin, "Min beitu hriamhrei ken ka hmuh khan ring takin ka au a, ka fapa leh kan pa chu rang taka lo tlanin, misual hi an rawn man a ni," a ti. A chhungte'n misual hi an man hnuah, Police Superintendent (SP) hriattir nghal a nih thu a sawi bawk.

Police-te hian thil thlen dan hi an chhui chiang mek a, pawikhawihtu hi a khawsakzia aṭangin rilru lam harsatna nei a nih an ring tih an sawi. East Khasi Hills Police Superintendent Sylvester Nongtynger chuan pawikhawihna hi Thawhlehni zan dar 7:30 bawr vela thleng a ni tih a sawi. He thil thlen hnu hian, minister chenna inah hian security tihkhauh leh zual a ni tih a sawi.

Tun hnaiah Minister chenna bul Laitumkhrah police station pawh zu ruiin beiin, compound chhunga dah motor pali hal a lo ni tawh bawk a ni.