Manipur Police-te'n Meitei Leepun hotu lakah thubuai ziak lut

Manipur police chuan Meitei Leepun hotu, Pramot Singh chu pawl pahnih inkara inhuatna chawk chhuak zawnga thil ti leh, pawikhawihna thlen zawnga chea puhin, a lakah criminal case an ziak lut.

Kuki Students Organisation (KSO), Sadar Hills, Kangpokpi-in Meitei Leepun hotu laka complaint an theh luh hnuah, July 8 khan police chuan Singh lakah hian FIR an ziak lut tih sorkar lam thuchhuak chuan a tarlang a ni.

Kuki pawlte chuan Manipur-a inbeihna nasa tak thlengah, Meitei organisation Meitei Leepun bakah, Arambai Tenggol chu buaina chawk chhuaktuah an puh a ni. Zirlai pawl hian June 13 khan complaint hi an theh lut tawh a, mahse, July 8-ah FIR hi ziah luh chauh a ni thung. Indian Penal Code (IPC)-a Section 120B, 153A, 504, 505, 506 leh 34 hnuaiahte thubuai siamsak a ni.

KSO-in complaint an theh luhah hian, Singh hian June 7-a interview a neihah, 'Kuki chu pawn lam mi, Manipur leilung fa an ni lo," tiin a sawi. Gun license neite hnena silai kah leh hman dan zirtirnaah Meitei Leepun chuan a inhnamhnawih ngei tih pawh a pawm thu a sawi bawk. An state-a buaina chhuak mekah sorkar laipui emaw, Manipur sorkar emaw a inrawlh thuai loh chuan, civil war a chhuak ang a, Kuki-te chu an invenghim thei lo ang, ti tein a sawi niin an tarlang.

Hetih lai hian Pramot Singh chuan a laka FIR ziah luh a nih chungchangah engmah hriattir a nih loh thu leh, a tihbuai loh thu a sawi.