Assam : Tuilianin Lakhimpur-a khaw 67 a chim tawh

Assam tuilian chuan zual lam a la pan zel a, Lakhimpur district-a revenue circle pali hnuaia khaw 67 chu tuilian hian a chim tawh a ni.

Assam State Disaster Management Authority (ASDMA) chuan mi 60,300 dawnin tuilian hi an tuar a, Nowboicha revenue circle area-ah tuilian hian mi 37,700 a tibuai a, Bihpuria revenue circle-ah chuan mi 22,510 -in tuilian hi an tuar tih a sawi.

Tuilian hian thlai chinna hmun hectare 545.50 vel a chim pil tawh a, ran vulh 10,000 chuang chu tuilian hian a tibuai bawk. District thuneitute chuan tuilian thlennaah hian chhawmdawlna bungraw sem hna hmun sarihah thawh mek a ni, an ti.

Hetih lai hian Brahmaputra lui pawh chawl loa ruah a sur reng avangin a chim chin a sang zel a, Sonitpur district-a Tezpur leh Jorhat district-a Neamatihat-ah te chuan lui tui chim san zawng hian a him chin a pel tawh a ni. Sivasagar district-a Nanglamuraghat-ah chuan pawh Disang lui chu a him chin aia sang a ni tawh tih an sawi.

ADSMA chuan Dhemaji district-ah mi 2,696 in tuilian hi an tuar a, Biswanath Sub-Division, Sonitpur district-ah mi 2866 chu tuilianin a tihbuai thu an sawi bawk. National Disaster Response Force (NDRF) leh State Disaster Response Force (SDRF) mi leh sate chuan chhanchhuahna hna an kalpui mek a, Fire & Emergency Services department pawh a ṭul anga che chhuak thei turin an inring reng bawk a ni.