EU Parliament-in Manipur chungchangah resolution pass; India sorkarin ramchhung thil a nih thuin a chhang let

European Parliament chuan Manipur tualchhung buaina thleng mek chungchang an sawiho hnuin, he buaina thlenga BJP hruaitute hmalak dan chu na taka an dem thu sawiin Nilaini khan resolution an pass. India sorkara thuneitute chu buaina chhuak titawp tura theihtawp chhuah turin an phût.

India sorkar chuan EU Parliament resolution pass hi a pawm loh thu sawiin a chhang let nghal. He thil hi India ramchhung thil a ni a, EU Parliament chet dan chu 'colonial mindset' tilangtu a ni, a ti.

Strasbourg, France-a EU Parliament plenary session neihah Manipur-a hnam leh hnam inkara buaina thleng meka mihring dikna chanvo palzut, democracy kalphung bawhchhiat leh dan kenkawh dan dik tawk lo chungchangte sawiho a ni. Manipur-a thisen chhuahna thleng, mi tam takin nunna an chan phah leh in leh building tam tak tihchhiat a ni chu an dem thu sawiin, India ramah hnam leh sakhaw tlem zawk, human rights defender leh journalist-te chuan tihbuai an tawk fo a, a bikin hmeichhiate chu an sakhua leh tribal an nihna hmangin an dikna chanvote palzutsak an ni fo a ni, a ti.

Resolution an pass-ah hian kum 2020, October thlaa UN High Commissioner for Human Rights-in India hnenah human rights activist-te himna ngaihtuah tur te, BJP-in inhuatna leh inṭhendarhna policy a kalpui nia puhna ngaihven zui tura a lo tih tawhnate pawh an sawi chhuak leh bawk.

EU Parliament chuan, "India-a Manipur state-a Hindu Meitei leh Kristian Kuki tribe-te inkara buaina chhuakah mi 100 chuangin nunna an chan tawh a, sakhaw hmun pawimawhte tihchhiat niin mi 40,000 chuangin an in leh lo an tlan chhuah san tawh bawk. Buaina chhuak hi human rights group-te chuan Manipur leh central-a BJP kaihhruai sorkarin sakhaw tlem zawkte rahbehna, inṭhendarhna/inhuatna policy a kalpui vang niin an puh a ni," tiin resolution-ah hian an tarlang a, Manipur-a sipai thuneihna sang pekna Armed Forces Special Powers Act (AFSPA) hman mek chu titawp tur leh, internet service pawh tinung thuai tura an phût thu an tarlang bawk a ni.