Election Commission team-in Assam tlawh dawn

Election Commission of India (ECI) chuan constituency sawr zimna tura ruahmanna siam chungchangah, mipuite ngaihdan la tur leh hriat fiah ngaite sawi fiah turin ni thum chamin July 19 - 21 hian Assam an tlawh dawn.

ECI team hian an cham chhungin politial party-te leh vantlang mipuite kawmin, draft proposal chungchanga sawisel tur leh thurawn pek tur an neihte sawihona hun a siam ang.

Guwahati-a Srimanta Sankardev Kalakshetra hmunah inkawm khawmna hun neih a ni ang a, political party leh organization hrang hrang aiawhte chu an duh dan sawina hun pek vek an ni dawn a ni. ECI team hian district tina stakeholder-te pawh tlawhin, assembly leh parliamentary constituency siam rem chungchanga an ngaihdante an sawipui dawn bawk.

July 19-ah Kokrajhar, Chirang, Baksa, Udalguri, Karbi Anglong, West Karbi Anglong, leh Dima Hasao district aiawhte meeting an neihpui dawn a, July 20-ah Dhubri, Goalpara, South Salmara, Bongaigaon, Barpeta, Nalbari, Kamrup, Kamrup (Metro), Nagaon, Sonitpur, Morigaon leh July 21-ah Dibrugarh, Tinsukia, Dhemaji, Lakhimpur, Sivasagar, Jorhat, Charaideo, Golaghat, leh Majuli district-a party leh organization-te an hmu dawn bawk a ni.