"Manipur buaina EU Parliament-ah sawiho a ni tawh; Prime Minister erawh a la ngawi" - Rahul Gandhi

Congress party hruaitu, Rahul Gandhi chuan kar liam ta Inrinni khan, Manipur buaina chungchang chu European Parliament-ah pawh sawiho a nih tawh hnuah, prime minister Narendra Modi a la ngawi tlat chu a sawisel.

Manipur chungchanga sorkar hmalaknate duh khawp loa lo sawisel fo tawhtu, Congress general secretary Jairam Ramesh pawhin sorkar laipui chu a dem tih a sawi ve leh bawk.

Rahul Gandhi chuan, "Manipur a buai mek. EU Parliament-in India tualchhung inrelbawlna an sawiho tawh bawk. Mahse PM chuan hemi chungchangah hian engmah a la sawi lo ve ve! Hetih lai hian, Bastille Day Parade erawh a hmanpui thung," tiin a Twitter-ah a tarlang.

Ramesh pawhin sorkar laipui sawiselin, "Kum 1977, January thla khan Yale University-a economist lar tak Richard Nelson chuan The Moon and the Ghetto tih essay lar tak a ziak. Graduate school zirlaiah telh a ni nghe nghe. Nelson chuan enga tinge technology-a sang tak America chuan mihring thlaah a lawntir theih laiin, khaw chhunga mipuiin harsatna a tawhte a chinfel theih loh, tiin a zawt. Hei hian ngaihtuahna a tithuiin, tuna kan dinhmun nen pawh a hmeh bel theih a ni," a ti.

Ramesh chuan, "Thlaah kan lawn thei a, amaherawhchu, mipuite harsatna kan chingfel thei lo. Nelson-a essay hi Indian version-in chhuah dawn ta ila, 'The Moon and Manipur' tih a ni ang," a ti bawk.

European Parliament chuan Ningani khan Manipur chungchang sawihoin tualchhung buaina thleng mekah India sorkar hmalak dan demin resolution an pass a, India chuan lo chhang letin, ramchhung thil a nih thu leh, EU Parliament-in resolution a lo siam chu "colonial mindset" hlimthla a ni tiin a dem let ve thung.

External Affairs Ministry thupuangtu Arindam Bagchi chuan, India tualchhung inrelbawlnaa midang inrawlh hi thil hriatthiam theih loh tawp a ni tih a sawi.