Meghalaya sorkarin member 4 awmna Education Commission a din

Meghalaya sorkar chuan education siam ṭhat dan tur ngaihtuah turin, member pali awmna State Education Commission a din a, chairperson atan NEHU-a Education department head Sherwin May Sungoh ruat a ni.

Commission hian zirna in hrang hrang; school, college leh higher and technical institution-ahte zirna quality ṭha zawk pek a nih theihna turin thurawn leh rawtna a siam ṭhin ang. Chairperson bakah hian member atan, UPSC chairman hlui David Reid Syiemlieh, MBOSE executive chairman hlui Tony TC Marak leh education secretary Ambrose Ch Marak-te chu ruat an ni bawk.

Sorkar thuchhuahin a tarlan danin, commission hi co-opted member 12-in an pui dawn bawk a, co-opted member-te term hi kum hnih zel a ni ang.

"Education Commission chuan NEP 2020 thil tum leh innghahnate tihhlawhtlin tum chungin, school leh zirna in sang zawkte siam ṭhatna tur rawtna a siam ṭhin ang," tiin sorkar thuchhuak chuan a tarlang.

Hei bakah hian, commission chuan school leh college inrelbawlna, thawktu hlawh leh school management kalpui dan leh mawhphurhna chenin Meghalaya sorkar chu thurawn a pe ṭhin dawn tih thuchhuah chuan a tarlang bawk.

Education minister Rakkam A Sangma chuan commission hian Meghalaya chhunga zirna in hrang hrangte'n harsatna an tawh ṭhinte a zir chiang bawk ang tih sawiin, zirtirtu aided category hrang hranga awmte chu sorkar rawih zirtirtu nen hlawh intluktlang an neih theih nan hma a la dawn bawk a ni, a ti.