Assam sorkarin tihluihna leh inbumna hmanga Sakhaw inlehtir venna tur bill a pharh dawn

Assam chief minister Himanta Biswa Sarma chuan kar liam ta khan state chhunga sakhaw inlehna hluar tak chu a dem tih sawiin, a kaihhruai sorkar chuan tribal-te culture humhim tlat a tum tih a sawi.

Guwahati-a grant-in-aid semna function-ah he thu hi Sarma chuan a sawi a ni. He function-ah hian, indigenous leh tribal rinna leh nunphung humhimtu organization 18-te hnenah Rs. nuai 10 ṭheuh, indigenous leh tribal-te sakhaw biakna hmun 73-te hnenah Rs. nuai 5 ṭheuh leh Garchuk hmuna All Bathou Mahasabha tan Rs. vbc. 2 a sem a ni.

Sarma chuan, "Northeast-a indigenous leh tribal hnam zingah sakhaw inlehna a hluar nasa. Hei hian heng hnamte rinna leh chin ṭhinte a ti dal a ni," tiin a sawi. Sorkar chu tribal-te culture humhim turin a inpe a, inbumna hmanga sakhaw inlehtir hi tihtawp a ngai, a ti.

Assam CM chuan, "India danpui Article 25 chuan sakhaw zalenna mitin hnenah a pe a, amaherawhchu, inbumna leh tihluihna hmanga sakhaw inlehtir erawh phal a ni lo," tih a sawi. Sakhaw inlehna avang hian khawvela indigenous tam takte an ral mek a ni, a ti bawk.

Hetiang thil hi Assam-ah a thlen ve lohna turin theihtawp chhuah a ngaih thu Sarma chuan a sawi a, Assam mipuite chu an culture leh tradition-te chawi nung tur leh vawnghim turin a ngen.

Chief Minister chuan state sorkar-in indigenous leh tribal-te vawnghimtu tur department hran hlak a din tur thu a puan bakah, sakhaw inlehna chungchanga tlawhchhan tur bill pawh state assembly ah pharh a nih tur thu a sawi. He bill hian inbumna leh tihluihnaa sakhaw inlehna a veng dawn a ni, a ti.