Assam tuilianin ziaawm lam a pan thei lo

Assam-a tuilian chuan ziaawm lam a la pan thei lo a, state chhungah mi nuai 1 velin tui lian hi an la tuar mek a ni.

Assam State Disaster Management Authority (ASDMA)-in a tarlan danin, state chhunga district 10; Sonitpur, Chirang, Darrang, Dhemaji, Dibrugarh, Golaghat, Lakhimpur, Majuli, Sivasagar leh Udalguri district chu tuiin a la chim reng a, heng hmuna cheng mi 98,800-te chuan tuilian hi an la tuar mek.

Golaghat district chuan tuilian hi an tuar nasa ber a, tuilian tuartu mi 29,000 dawn an tling. Dhemaji district chuan dawtin, mi 28,000 bawr velin tuilian an tuar a, Sivasagar-ah tuilian tuartu mi 13,500 an awm bawk.

Assam state chhunga khaw 371-te chu tuiin a chim a, thlai chinna hmun hectare 3618.35 chu tuiin a chim chhe tawh bawk niin ASDMA chuan a tarlang.

Dhubri, Tezpur leh Neamatighat hmunah Brahmaputra lui chuan hlauhawm chhinchhiahna a pel tawh a, Brahmaputra-a luang lut Dikhou lui pawh Sivasagar district-ah nasa takin a lian bawk.