Congress-in Manipur CM bang turin an phût leh

Manipur-a eptu pawl, Congress chuan Thawhṭanni khan tualchhung buaina chhuah aṭanga ni 75 a ral hnuah pawh boruak ralmuang a la siam theih loh avangin, chief minister N Biren Singh chu bang turin an phût nawn leh.

Congress state general secretary P. Saratchandra chuan pawisawi lo tam takin nunna an chan tawh a, mi sang chuang awmna mumal nei loin an awm a, eng ang dinhmun nge an tawn zel dawn pawh hre loin an la awm mek a ni, a ti. Manipur sorkar chu inkahhai a lo puanpui tawh, militant-te'n inremna siam an bawhchhe chunga an laka action a lak loh chhan a zawt bawk.

"State leh mipuite ngaihsak lo, nihna chiah vawnhim tum CM hman tlak loh neih hi kan duh lo. BJP sorkarah hian kan rinna kan hloh tawh a, state sorkar hian Manipur mipuite hi a venghim dawn lo tih rinna lian tak kan nei," tiin Saratchandra chuan chanchinthar lakhawmtute a hrilh.

Congress hruaitu chuan, "State sorkar chuan Manipur-a buaina chingfel tur leh state ralmuanga siam leh turin hun tiam nei rawh se. Chutiang a ti thei lo a nih chuan, midang kutah hlan rawh se," a ti bawk.

Manipur State Congress president Keisham Meghachandra leh party hruaitu ṭhenkhat chuan Thawhṭanni khan relief camp-te tlawhin, heng hmuna khawsa mek naupangte hnenah thilpek chi hrang hrang an pe a ni.

NRF-in Khongsang station hawng

Northeast Frontier Railway chuan tualchhung buaina thlen mekna, Manipur-in a mamawh a chawk luh theihna atan Thawhṭanni khan Khongsang station chu an hawng tih a sawi.

NFR chief public relations officer, Sabyasachi De chuan thuchhuah siamin, tualchhung buaina a thlen hnuah Manipur-a mamawh chawk luhna kawngte chu dan vek a ni, a ti. Mahse khawsakna atana mamawh leh ei turte lak luh a nih theih nan NRF chuan state sorkar thawhpuiin, bungraw load leh unload-na atan Khongsang station chu hawn a ni tih a tarlang.

Khongsang station hi kum 2022 khan Jiribam–Imphal new line project hnuaiah hawn a ni a, May 3-a tualchhung buaina a chhuah aṭang khan he line hi khar a ni.