Tripura: TIPRA Motha chief a nihna aṭangin Pradyot a chawl

Tripura-a eptu party lian ber, TIPRA Motha party chairman Pradyot Kishore Manikya Debbarman chuan party chairman a nihna a chawlh san.

Tripura lal thlah, Pradyot Debbarma chuan party chairman ni tawh loin, party tana theihtawpa thawktu member satliah erawh a la ni chhunzawm zel dawn tih social media kaltlangin a sawi.

TTAADC headquarter, Khumulwng hmuna TIPRA Motha party-in plenary session hmasa ber an neihnaa party constitution siam ṭhat a nih hnuah, Pradyot chuan party chairman a nihna hi a chawlh san. Debbarman-a'n kum hnih chhung a lo chelh tawh party chairman dinhmun chu a chawlh san rual hian a post hi tihtawp a ni nghal bawk.

Party constitution thar chu Pathianni aṭang khan hman ṭan niin, constitution tharah hian, party president chuan party a kaihruai dawn a, party president chu state conference-in a ruat ṭhin ang, tih a ni.

Party president ni lai Bijay Kumar Hrangkhwal chu president a ni chhunzawm dawn a, Debbarman chu member satliah angin a awm tawh ang.

Debbarman chuan, "TIPRA Motha party chiarman kum hnih ka lo chelh tawh chu a lo tawp ta a, ruat nawn leh ka beisei lo. Kan constitution tharin a tarlan angin, president chu party hotu lu ber a ni ang. Hon'ble BK Hrangkhawl chuan TIPRA Motha party president ni chhunzawmin, party a hruai ang a, kei chu party member niin party tan theihtawp ka thawk ang," tiin thuchhuah a siam.