Assam CM thusawi dan avangin CJI hnenah TMC an zualko

All India Trinamool Congress (AITC) Assam unit chuan Assam chief minister Himanta Biswa Sarma chu 'Miya' hnam huatna chawk chhuak thei, 'hate speech' sawiah puhin, Chief Justice of India hnenah action la tura ngenna an thawn.

'Miya' tih hi East Bengal chhuak Bengali ṭawng hmang, Assam state-a cheng Muslim-te sawina a ni.

Chief Minister Sarma chuan Assam-a thlai man to chhanah Miya-te hi a puh a, Miya sumdawngte avangin Guwahati-ah thlai man nasa takin a sang a ni tiin, Assamese vendor-te chuan an mite chungah hetiang hian an ti lo ang, a ti a ni. "Guwahati-a footpath zawng zawng hi ka tiruak vek ang a, Assamese mipuite chu heng hmuna sumdawng tur hian ka ngen a ni," tiin Sarma chuan a sawi.

Assam TMC president Ripun Bora chuan Supreme Court Chief Justice D Y Chandrachud hnena lehkha a thawnah, Chief Minister chu 'Miya' community-te huatna chawk tho thei 'hate speech' a sawi avanga a chunga action la tur leh, Assam sorkar laka thubuai siamsak turin a ngen a, "Sarma thusawi chuan hnam pakhat chauh a tithinur ringawt lo a, khawtlang inhuatna a thlen thei a ni," a ti.

Congress party leh eptu party dangte chuan CM Sharma-a'n Miya hnam chungchang a sawi dan hi na takin an lo sawisel tawh bawk.