Assam Delimitation Exercise: Eptu party 9-in EC rawtna siam duh lo; Supreme Court-ah an zualko
Election Commission-in Assam state tana bial huam chin siam dan tura a rawtna, delimitation draft-a buatsaih dan chu duh loin eptu party pakuate chu Supreme Court-ah an zualko.
June 20-a EC draft buatsaih an tlangzarhah hian, Muslim tamna hmun ṭhahnem tak chu ṭhiatin Hindu tamna hmun bialahte rin luh a ni.
Supreme Court-a draft siam an duh loh thu thlentute hi Congress, Raijor Dal, Assam Jatiya Parishad, Communist Party of India (Marxist), Communist Party of India, Trinamool Congress, Nationalist Congress Party, Rashtriya Janata Dal leh Anchalik Gana Morcha party-te an ni.
Court-a petition an theh luhah, Election Commission-in delimination process kalpui nana a tlawhchhan, Representation of People Act, 1950 hnuaia Section 8A chu an duh lo tih sawiin, poll body-in bial rin ṭhat dan tur kalpui an tum danah hian district hrang hrang tan assembly size average hrang hrang lak a ni a, mipui awm zat buk tel a ni lo tih an sawi.
Eptu party-te chuan, 2001 census tehfunga hmangin, Election Commission chuan district-te chu hlawm thumah a ṭhen a, hlawm tinte tan tehfung hran a hmang vek tih an sawi a, hei vang hian bial lian ber leh te bera mipui awm zat inthlauhna hi 33% zet a ni, an ti. Chief minister Himanta Biswa Sarma thuchhuah siamah pawh, bial rin ṭhat hi BJP sorkarin a hlawkpuina tur zawnga tih a ni, tih lam hawiin a sawi niin an tarlang bawk.
Barak Valley-a assembly seat chu 15 aṭangin 13-a titlem turin draft-ah hian ruahman a ni a, Mulsim tamna Karimganj leh Hailakandi district-ah bial khat ve vea tihtlem tum a ni. Muslim tamna hmun dang Barpeta-ah pawh Assembly seat chu pariat aṭangin paruk-ah tihtlem tum a ni bawk. Draft hi pawm a nih chuan, he biala seat paruk zinga pakhat chu Scheduled Caste tan dah a ni ang.
Election Commission chuan state puma Schedule Caste tana seat hauh chu pariat aṭangin pakhuaa tihpun leh, Schedule Tribe tana hauh pawh16 aṭangin 19-a tihpun a rawt. Seat awm zat, Assembly seat 126 leh Lok Sabha seat 14 erawh tihdanglam a ni lo.