Manipur: Lucy Marem thah chungchangah UNC leh COCOMI-te'n MoU ziak

United Naga Council (UNC) leh Coordinating Committee on Manipur Integrity (COCOMI)-te chuan Thawhlehni khan CM Secretariat-ah Lucy Marem thah a nih chungchangah memorandum of understanding (MoU) an ziak.

MoU hi UNC president NG Lorho, COCOMI coordinator Jeetendra Ningomba leh Secretary to the Chief Minister Ningthoujam Geoffrey-te'n chief minister N Biren Singh hmaah an sign a ni.

Inremna an siamah hian Manipur sorkar chuan mitthi chhungte hnenah Rs. nuai 20 pek leh mitthi fanu chu a rang thei ang bera sorkar hna pek a tiam.

UNC chuan Manipur-a Meitei leh Kuki hnam inkar buaina chhuak karah, Sawombung hmuna Maring Naga hmeichhia M Lucy rawng taka thah a ni chu an dem thu leh an lungawi loh thu sawiin, Chief Minister hnenah an thlen a ni. M Lucy hi Chandel district-a Narum khaw mi niin, Tengnoual district-a Langol Game Village Zone III-ah a khawsa a ni. July 15 khan M Lucy hi Meira Paibis (Women Torch Bearer)-te chuan manin, militant indin thar Arambai Tenggol hnenah an hlan a, Naga nu a ni tih an hriat hnuah an that a ni.

Tualthahna kaihhnawihah hian mi pakhua man an ni tawh a, an zingah hian hmeichhia panga an tel. Pawl hrang hrangin he thil thleng hi an dem thu sawiin, Manipur valley district-a hmun hrang hrangah sit-in protest an huaihawt.

COCOMI chuan he pawikhawihna thlengah hian mawhphurhna an la tih sawiin, M Lucy rawng taka thah a ni chu pawi an tih thu an sawi a, UNC kaihhruai Naga palaite chungah pawh ngaihdam an dil bawk a ni.

Chief Minisister chuan tuahthahna rapthlak tak thleng chu a dem tih sawiin, M Lucy chhungte leh UNC aiawhte chu a tuarpui thu a sawi a, tualthattute chuan an phu tawk hremna an hmu ngei dawn tih sawi.