Nagaland sorkarin zirtirtute attendance AI hmangin chhinchhiah

Nagaland-a Department of School Education (DoSE) chuan sorkar school-a zirtirtute attendance chu geo-positioning leh artificial intelligence hmangin an chhinchiah tih Advisor for School Education Dr. Kekhrie Yhome chuan Thawhlehni khan a sawi.

Yhome chuan an hmalakna thar chu Nagaland-a sorkar school zirtirtute'n ṭha taka hna an thawhna tura tih a ni, a ti. Zunheboto district-a Akhakhu khua a thawhnaah, Yhome chuan AI hmanga attendance chhinchiah chuan zirtirtute school compound-ah an awm ngei em tih a finfiah dawn tih a sawi a ni.

Yhome hian Zunheboto district-a sorkar school-te a en dik mek a, education department chuan a hnuaia sorkar school zirtirtu zawng zawngte assessment a buatsaih mek a ni tih a sawi bawk.

Zunheboto district-ah hian private school 49 leh sorkar school 223 a awm a, sorkar school hian zirlai 7,117 neiin, private school-ah hian zirlai 11,126 an awm thung.

School-in resource a neih angte ṭha leh zuala hman a nih theihna turin, khaw tinah feeder school siam a ṭul thu Yhome chuan a sawi.Village Council-te chu zirtirtute'n an hnathawhna khuaa in luah tur leh an mamawh dangte an dapna kawnga pui ṭhin turin a chah bawk.