Manipur : Video darh chungchangah CM-in rang taka hma lak tiam; Sorkar a chet loh chuan kan che chhuak ang : Supreme Court

Manipur-a mipa rualin tribal hmeichhe pahnih, saruaka kawng an zawhtir lai video chu Nilaini khan a darh a, he thil thleng hian ramchhung leh ram pawn thlengin sawisel leh dem a tawk nasa hle.

Chief minister N Biren Singh chuan he thil thleng hi na taka a dem thu sawiin, 'mihring chunga pawikhawihna a ni' a ti a, sorkar chuan video darh chungchang chu a chhui chiang nghal a, pawikhawhtute man turin theihtawp a chhuah dawn a ni, a ti.

CM Singh chuan, "He thil hi bawhzui nghal turin thupek ka chhuah tawh a, keimah ngeiin investigation hi ka vil dawn a ni," tiin a sawi.

Indigenous Tribal Leaders' Forum (ITLF) chuan he thil hi Manipur tualchhung buaina chhuah tuk, May 4-a Imphal aṭanga km 35-a hla, Kangpokpi district-a thleng a nih thu an sawi. Hmeichhe pahnihte hi pawngsual rawn an ni bawk niin a tarlang.

Superintendent of Police (SP) K Meghachandra Singh chuan, "May 4, 2023-a ralthuam keng misual tu tih hriat lohte'n hmeichhe pahnih saruaka kawng an zawhtir chungchangah ruk bo, pawngsual rawn leh tualthah case ziahluh a ni tawh. Investigation kalpui nghal a ni a, police-te chuan misualte hi a rang thei ang bera man turin theihtawp an chhuah mek," a ti.

Tribal hmeichhe pahnih chunga rawng taka chetna thleng avanga lungawi lohna lantirin, nimin khan Manipur-a Churanchandpur khuaah kawngzawh huaihawt a ni a, tel an ṭhahnem hle.

Video la thla turin twitter a hriattir

Sorkar laipui chuan nimin khan Twitter leh social media dangte chu Manipur hmeichhe pahnih saruak video chu chhui zui mek a nih avangin la thla turin a hriattir.

India rama social media platform hrang hrangte chu India dan zawm tura hriattirin, he video hi la thla vek turin a ti a ni. Manipur police-te chuan he thil thlengah hian thubuai an ziak lut tawh a, misualte manchhuah an nih thuai theihna turin theihtawp an chhuah mek tih an sawi.

Irani-i'n Manipur CM bia

Union women and child development minister Smirti Irani chuan tribal hmeichhe pahnihte chunga thil thleng rapthlak tak video a darh hnuah, Manipur chief minister N Biren Singh leh state chief secretary-te a be nghal a, pawikhawihtute chungah a na thei ang bera action la turin a hrilh.

Irani hian a twitter-ah video hi share-in, Manipur hmeichhe pahnih chunga rawng taka chetna thleng chu a dem takzet tih a sawi.

Hetih lai hian eptu party-a hmeichhe MP-te chuan Union Minister hi a twitter-ah video a share avangin an sawisel nasa hle a, thla hnih liam taa thil thleng tawh chungah action lak a ni lo chu an dem thu an sawi. Thla khat liam ta khan FIR thehluh a ni chungin, Manipur sorkar leh Union Minister hian hma engmah an la lo niin an puh bawk.

India-in a ngaidam ngai lo ang - Congress

Congress party chuan Manipur hmeichhe pahnihte chunga thil thleng rapthlak tak chungchangah sorkar laipui chu na takin a dem a, BJP kaihhruai sorkar chuan hmarchhak state-a democracy chu mobocracy-ah a chantir a ni, a ti.

Congress president Mallikarjun Kharge chuan, "Manipur-ah chuan mihring inzahtawnna a thi ta. Modi sorkar leh BJP chuan democoracy chu tharum hmanga mipui rorelna (mobocracy)-ah an chantir a, khawtlang inrelbawlnate an tichhe vek a ni," a ti a, "Narendra Modi Ji, India hian i ngawi tlat hi a ngaidam ngai lo ang che," tiin a twitter-ah a tarlang.

Party hruaitu Rahul Gandhi pawhin, Rahul Gandhi pawhin, "PM a ngawih reng avang leh hma a lak loh avangin Manipur chu hruaitu neilo angin a buai a ni. Manipur-ah India beih a nih mek lai hian, INDIA hi a ngawi reng dawn lo. Manipur mipuite tan kan ding reng. Inremna a awm chauhin hmalam a pen theih ang," tiin a tweet ve bawk.

Congress general secretary Jairam Ramesh pawh ṭawngchhuakin, hmeichhe pahnihte sawisak leh pawngsual an nih aṭang hian ni 77 a liam tawh tih a sawi a, Manipur-ah internet titawp a nih avangin ram chhung mipui tam zawkin thil thlengte an hre lo a, "Mahse hetiang thil a thleng chunga women and child development minister Smirti Irani-i'n Manipur CM be tur emaw, thuchhuah emaw siam tura ni 76 zet a nghak hi eng kawng maha insawithiam theih a ni lo," a ti. Manipur-a thil thlengte chu sorkar laipui, Home Minister leh Prime Minister-te chuan an hre miah loh em ni? tia zawtin, Modi kaihhruai sorkar chu Manipur boruak ṭha zel anga a lantir ṭhin a tihtawp hun tur a zawt.

Manipur Police-ten mi 1 an man tawh

Manipur police-te chuan Nilainia video darh, tribal hmeichhe pahnih chunga rawng taka chetna thleng chungchangah a mawphurtu ber nia sawi chu nimin khan an man tih an sawi.

Nilainia video a darh hnu hian, police-te chuan misualte zawng chhuak tur hian team hrang hrang an din nghal a ni. He pawikhawihnaa mawhphurtu nia sawi pakhat, Meitei hnam kum 32 mi, Khuirem Herodas inti chu Thoubal district-ah nimin khan an man a, midang inhnamhnawihte pawh man chhuah thuai an nih tur thu an sawi bawk.

Sorkar a chet loh chuan kan che chhuak ang : Supreme Court

Supreme Court chuan Manipur-a hmeichhe pahnih chunga thil thleng chu rapthlak a tih thu sawiin, 'Constitutional democracy-ah hetiang thil thleng hi pawmzam theih a ni lo," a ti.

Chief justice of India, DY Chandrachuda chuan sorkar laipui leh Manipur sorkar chu rang taka hma la tura tiin, hmeichhiate himna tura sorkarin hma a lak dan pawh court-ah hriattir zel turin a ti nghal bawk. CJI chuan, "Sorkarin hma a la lo a nih chuan, Supreme Court a che dawn," tia vaukhanin, hemi chungchang hi court chuan July 28-ah a ngaihtuah dawn tih a sawi nghal bawk. He video darh hian an rilru a ti na takzet a, a tuartute an ngaihtuah thu sawiin, sorkar chuan rang taka hma a lak a, a chetchhuah a hun tawh a ni, a ti.

Ni 77 hnuah PM Modi a ṭawngchhuak

Manipur tualchhung buaina chhuah aṭanga ni 77 hnuah a ṭum khatna atan prime minister Narendra Modi chu Manipur-a thil thleng chungchangah a ṭawngchhuak ve.

Online lama hmeichhe pahnih saruaka kawngzawh tir lai video a darh hnuah, PM MOdi hi Manipur chungchangah hian ṭawngkam a nei ve chauh a ni.

Modi chuan, hmeichhe pahnihte chungchanga thil thleng chuan India ram mipui mi vaibelchhe 140-te chu zak takin a siam a ni tiin, misualte chu dan hmanga na taka hrem an ni dawn tih a sawi. Hmeichhe pahnihte chunga thil thleng chuan a ti nain a ti thinur takzet tih a sawi a, 'Manipur fanute chunga thleng hi ngaihdam theih a ni ngai lo ang," a ti. He thila inhnamhnawih zawng zawng chu tumah dim an ni dawn lo tiin, ram chhunga chief minister zawng zawngte chu an state-ah dan leh thupek khauh taka kengkawh vek turin a ti zui bawk.