Vawiinah KMSS in political Party thar a puang dawn

Assam-a  Krishak Mukti Sangram Samiti (KMSS) chuan vawiin hian political party thar an din chu an puang dawn. Nakkuma state assembly inthlanah an chuh nghal dawn tih an sawi bawk. 

KMSS president Bhasco De Saikia chuan Nilainia press conference a neihah, Citizenship Amendment Act duh lotu, tualchhunga pawl hrang hrang 70-te chuan intelkhawma political party thar din hi an rel tih a sawi. Party thar kalphung tur leh inrelbawl dan turte pawh duan vek ni tawhin, vawiin hian an party thar hi an puang dawn tih a sawi a ni. Regional party pakhat pawhin an party thar hi zawm a tum tih a sawi bawk a ni. 

August 22 khan KMSS hian nakkum assembly inthlana chuh turin political party thar an din dawn tih hi an lo puang tawh a, an hruaitu jail-a tang mek Akhil Gogoi chuan a chhuah hunah campaign  pawh a ho nghal dawn a ni, an ti. 

Kum 2016-a state assembly  inthlanah khan party mala sorkarna siam thei an awm lo. Seat 126 awmna Assam assembly-ah BJP chu party mala seat la hnem ber niin, MLA 60 a nei a, a thawhpui Asom Gana Parishad (AGP) leh Bodoland People's Front (BPF) chuan MLA 14 leh 12 neiin, BJP kaihhruai ṭangrual sorkar hi independent MLA pakhatin a thlawp bawk a ni. 

Eptu party lian ber, Congress chuan MLA 23 neiin, All India United Democratic Front (AIUDF) chuan member 14 a nei bawk.