GHADC, JHADC-a central fund tihchingpen chhui dawn
Meghalaya-a National People's Party (NPP) kaihhruai, Meghalaya Democratic Alliance (MDA) sorkar chuan Jaintia Hills Autonomous District Council (JHADC) leh Garo Hills Autonomous District Council (GHADC)-a fund tihchingpen nia sawi chu chhui chiang turin Director of the Local Fund Audit (DLFA) a hriattir.
District Council Affairs (DCA) Minister Hamletson Dohling chuan, "DLFA hnenah hian ADC pahniha sorkar laipuiin Special Grant Assistance (SAC) scheme leh scheme dang atana sum pek hman dan chu chhui chiang turin kan hriattir tawh a ni," a ti.
DLFA hnena lehkha a thawnah, commissioner leh department secretary in-charge Aldous Mawlong chuan Governor Satya Pal Malik hnenah ADC pahniha centre scheme sum tam tham tak tihchingpen chungchangah complaint eng emaw zat thehluh a ni tih a tarlang. Officer leh staff-te hlawh pawh pek an ni lo niin Mawlong chuan a sawi bawk.
September 29, 2016 khan sorkar laipui chuan hmarchhak biala district council zawng zawng tan cheng vaibelchhe 1,000 a pe a, heng zinga Rs vbc 133.12 chu KHADC hnenah pek niin, JHADC hian Rs vbc 1.71 a dawng a, GHADC-in Rs vbc 33 a dawng bawk niin state BJP president Earnest Mawrie chuan a sawi.
Kum 2019, March 7-ah second instalment pek leh niin, KHADC tan Rs vbc 34.87, GHADC tan Rs vbc 34.40 leh JHADC tan Rs 11.62 pek a ni, a ti.
Hemi kum vek March 30 khan KHADC chuan Rs vbc 15.30 dawng lehin, GHADC-in Rs vbc 13.60 leh JHADC-in Rs vbc 5.10 an dawng leh bawk.
BJP state president hian Ministry of Finance hnenah ADC pahniha central scheme sum tihchingpen chungchang hi Central Bureau of Investigation (CBI) chhui tir turin ngenna a lo thehlut tawh bawk a ni.