Manipur-ah mi sing 6 tan temporary shelter house 800 sak tum a ni

Manipur sorkar chuan tualchhung buaina chhuak tuartute chawmdawl nan, in leh lo chan mi 60,000 tan awmna lailawkna (temporary shelter house) 800 chu August thla chhunga sak zawh hman a tum.

Information & Public Relations department chuan, valley district hmun hrang hranga shelter house sak mekte chu en dik hna thawkin a tlawh kual mek a ni.

In sak hnathawh viltu, Manipur Police Housing Corporation Ltd. Superintendent Engineer Brojendro Singh chuan, valley district-a temporary shelter house an sak ang hi hill district-ah pawh an sak tur thu a sawi.

P Brojendro Singh sawi danin Imphal East, Imphal West, Thoubal district leh Bishnupur district-a hmun hrang hrangah in 3,000 sak tum a ni a, hmun khatah hian chhungkaw 200 bawr vel zel awm tura ruahman a ni. Shelter house-te hi August thla lai hawla sak zawh tum a ni a, June thla tawp leh July thla tir lamah in sak hna hi ṭan a ni.

In sakna hmunahte hian mipui hman tur tuichhunchhuah laih a ni dawn a, electric la lut turin transformer dah vek tur a ni bawk ang.